د تخار د ینګېکلا ولسوالۍ د جندک کلي ۲۷ کلنه اوسېدونکي فریده وايي چې دوې شپې مخکې د دې کور ته د ولسي پاڅونوالو مشر ملک تاتار وسلهوالو کسان ورغلل او پر دې جنسي تېری وکړ.
دا چې ځان د فریدې په مستعار نامه ځان راپېژني وايي، دوه نفره یې کور ته ورننوتل، یو پر دې حمله وکړه او بل یې هڅه کوله چې د دې پر ۱۲ کلنې لور جنسي تېری وکړي؛ خو بریالی نهشو.
د دې د کورنۍ د نورو غړیو په اړه څه نهدي ویل شوي.
فریده وايي، پرون چې کله ځايي ادارې ته د شکایت ثبتولو لهپاره ورغله؛ د انور قزیل، میر، زمان او استاد حفیظ له لوري په لغتو ـ لغتو ووهل شوه. د دې په وینا، هغه څوک چې پهدې یې برید کړی؛ نه پېژني؛ خو د زمان په نامه شخص یې پېژندلی چې د دې پر لور یې د جنسي تېري هڅه کوله.
نوموړې وايي، د وسلهوالو لهخوا ګواښل شوې او خپل کورته نهشي ورګرځېدلی.
د تخار ولایت د ښځو چارو رییسه رزم ارا حواش سلاموطندار ته وویل، مېرمن فریده دوی ته عارضه شوېده او ادعا یې کړې چې تجاوز پرې شوی او وسلهوالو سخته ډبولې ده.
د ینګيکلا ولسوالۍ د پاڅونوالو قوماندان ملک تاتار وايي، پهدې پورې اړوند شوي کسان هېڅ نه پېژني.
د راپورونو لهمخې، په ورته وخت کې د تالقانو ښار په اختراباد کلي کې یو سړي خپله مېرمن په تبر او څټک وهلې ده. پولیس وايي، مېړه یې له طالبانو سره یوځای شوی او دغه مېرمن اوسمهال د کندوز په روغتون کې بستر ده.
