د تخار ولایت د کلګفان ولسوالي اوسېدونکیو او د قوماندان برزو نامسووله وسلهوالو نن د بدخشان ـ تخار لویه لار په یاده ولسوالي کې وتړله چې له کبله یې د مسافرو سلګونه موټر د لارې دواړو خواوو ته بند پاتې شول.
هغو کسانو چې غوښتل له یادې ولسوالي نه پلي تېر شي، د قوماندان برزو د نامسووله وسلهوالو له لوري سخت وهل شوي دي.
شفیق او مجیب چې د بدخشان اوسېدونکي دي او له یادې لارې تېرېدل، سلاموطندار ته وویل چې وسلهوالو د څو مسافرو لاس او پښې پرې مات کړل او ټول مسافران څو ساعته د وسلهوالو په لاس کې وو.
اعتراض کوونکي او نامسووله وسلهوال چې د بدخشان عمومي لار یې تړلې وه، په یاده ولسوالي کې د سیفالله په نوم د یوه بل نامسووله وسلهوال د نیولو غوښتنه کوله.
د ځايي مسوولانو په وینا، د سیفالدین کسانو چې د حزب اسلامي مخکینی غړی و، تېره ورځ د کلفګان ولسوالي په چهارتوت سیمه کې د قوماندان برزو پر کسانو برید وکړ چې له کبله یې د قوماندان برزو ۵ کسان ټپیان شول او یوه ښځه چې د سیمې اوسېدونکې وه، ووژل شوه.
اړوند مطالب:
تخار کې د نامسووله وسلهوالو نښتې
د تخار په کلفګان کې خلکو د افغانبېسیم د مخابراتي شبکې فعالیت بند کړ
طالبانو په سرپل او تخار کې ۱۸ ښوونځي تړلي
د کلفګان ولسوال وايي، قوماندان برزو هم په یاده ولسوالي کې نامسووله وسلهوال دی او شاوخوا ۱۰۰ نامسووله وسلهوال چې نن یې د تخار ـ بدخشان لویه لار تړلې وه، د نوموړي کسان دي.
په همدې حال کې د تخار د امنیه قومانداني ویاند خلیل اسیر وايي، ډېر شمېر نامسووله وسلهوال د معترضانو په ډله کې وو او د بدخشان ۳ اوسېدونکي یې وهلي هم دي.
د تخار ـ بدخشان لویه لار له څو ساعتونو بندېدو وروسته نن غرمه خلاصه شوه.
که څه هم کلفګان ولسوالي د تخار ولایت نسبتاً امن ولسوالي ده، خو نامسووله وسلهوالو په وروستیو میاشتو کې په یاده ولسوالي کې خپل فعالیتونه ډېر کړي دي.
