قشاق‌لیک، ایش‌سیزلیک و امنیتی قیینچیلیکلر احمدنور نینگ ناقانونی مهاجرلیک آرقه‌لی تشقی مملکتلر تامان یول آلیش گه زورلنتیردی.
احمدنور، تورموش اورتاغی و ایکی باله‌سی بیلن بیرینچی ده ایران تامان یول آلدی، بو یولده نیچه مرته قاچاقچیلر آره‌سیده قولمه قول بولیب و نهایتده ایران ده بیر قاچاقچی اولرنینگ گرو آلدی و شونینگدیک قوییب یوباریلیش‌لری بدلی‌ده کوپ پول طلب قیلدی.
احمدنور قاچاقچی گه کوپ پول بیردی و اوندن کیین کم پول بیلن ترکیه تامان کیتیش گه قصد قیلدی. او ناقانونی مهاجرلیک بدلی ده 5 یاشر قیزی نینگ قولدن بیریشی نی بیلمه‌س ایدی.
اوشبو ایرکک نینگ ایتیشیچه، تورت کیچه-کوندوز ایران و ترکیه آره‌سیده‌گی چیگره گه بند قالدیلر و بو پیتده کیچیک قیزی آچلیک و کسل‌لیک باعث کوزلری نینگ برابریده جان بیردی.
نهایتده، احمدنور قیزی نی توپراققه قوییش اوچون بیر قبر قازه آلمه‌دی. بو کیچیک باله‌سینی ایران و ترکیه چیگره‌سیده ایکی تاش آره‌سیده قوییب و تورموش اورتاغی و باشقه بیر فرزندی بیلن ترکیه گه داخل بولیشدی. ترکیه گه کیرگن بیرحالده بخت همراه‌لیک قیلمه‌ی او ییرده ترکیه پولیسی تامانیدن قولگه آلیندی. ترکیه پولیسی اولردن تدقیقات آلگندن کیین ایران تامان سورگون ایتدی وشونینگدیک ایران ده پولیس آرقه‌لی افغانستان گه جونه‌تیلدی.
او، برچه سرمایه‌سینی مهاجرلیک یولیده صرفله‌گن ایدی و حاضر حیات کیچیریش اوچون هیچ بیر نرسه‌سی قالمه‌گن. شو یوزه‌دن او، تورموش اورتاغی و 7 یاشر باله‌سی بیلن تاغه‌سی نینگ اویی‌ده جایلشگن.
احمدنور و تورموش اورتاغی سابق اوقیتووچی ایکن بیراق حاضر اولرنینگ هیچ بیر وظیفه‌سی یوق. او برچه سرمایه‌سینی ناقانونی مهاجرلیک یولیده قولدن بیرگن.
احمدنور باشقه عایله‌لردن مهاجرلیک نینگ اولیم‌لی و خوف‌لی یولی نی تنله‌ش بیلن اوزلری و عایله اعضالری نینگ حیاتی نی خوف بیلن روپه‌رو قیلمه‌سلیک‌لرینی سوره‌یدی.
شو توغریده:
- ناقانونی مهاجرلیک؛ یولداش‌لریدن 2 ته‌سی آچلیک باعث هلاک بولگن ییگیت نینگ حکایه‌سی
ناقانونی مهاجرلیک؛ معجزه‌وی شکلده اولیم‌دن قوتیلگن ییگیت نینگ حکایه‌سی
بلخ ولایتی نینگ مهاجرلر ریاستی باشلیغی سیدمحمدمسعود قادری نینگ ایتیشیچه، اوروش، ناتینچلیک و اجتماعی قیینچیلیکلر کوپنیچه عایله‌لرنینگ اولکه نی ترک قیلیب مهاجر بولیش‌لریگه سبب بولگن.
جناب قادری گه کوره، سونگی 6 آیده مملکت گه قیتگن 910 دن آرتیق کیشی بو اداره آرقه‌لی رویخط گه آلینگن.
بلخ‌ده انسانی حقلر ایرکین کمیسیون دفتری مسئوللری نینگ ایتیشیچه، مملکتده کونسایین ناقانونی مهاجرلیک کوپه‌یماقده و کوپینچه موردلرده مهاجرلر هلاک بولیشه‌دی.
بلخ‌ده انسانی حقلر ایرکین کمیسیون دفتر باشلیغی سیدمحمد سامع نینگ ایتیشیچه، حکومت خوفسیزلیک تأمین ایتیلیشی و ییگیت‌لرگه وظیفه ایجاد قیلیش حقیده اساسی ایش قیلمه‌گن صورتده، افغانستان هردایم تشقی مملکتلر چیگره‌سیده ییگیت‌لری نینگ قولدن بیریش گه شاهد بولیشی ممکن.
افغانستان ده موجود ناتینچلیک، قشاق‌لیک و اقتصادی قیینچیلیکلر کوپینچه عایله‌لر ناقانونی مهاجرلیک آرقه‌لی مملکتدن تشقی مهاجر بولیش‌لریگه سبب بولگن.
ناقانونی مهاجرلیک‌که یوق دیینگ!
