افغانستان بوییچه آمریکا کوچلرینی ییریک قومندانی اسکات میلرنینگ ایتیشیچه، طالبان گروهی افغانستان اهالیسی نینگ تینچلیک طلب ایسته‌گی گه تن بیرگونگه‌قدر، حربی باسیم آستیده بوله‌دی.
اونینگ ایتیشیچه، تینچ اهالی قربانلیگی نینگ آلدی آلینیشی اوچون زوروانلیک‌لر کمه‌ییشی اونملی دیر و «یوقاری مرتبه‌لی‌لرنینگ توشونچه‌سی گه کوره، افغانستان یشاوچیلری نینگ رهبرلیگی بیلن تینچلیک سوزلشوولری آرقه‌لی بو مملکت‌ده زوروانلیک‌که نقطه قوییلیشی کیره‌ک.»
جنرال میلرگه کوره، افغانستان خوفسیزلیک کوچلری همده طالبان گروهی زوروانلیک‌لر کمه‌ییشی گه سعی و حرکت قیلیش‌لری لازم.
افغانستان رسمی‌لری بیلن قوشمه خبری ییغین اوتکزگن اوشبو آمریکایی‌لیک جنرال، افغانستان گه قوشنی مملکت‌لردن منطقه‌ده برقرارلیک تأمین‌لنیشی گه یاردم بیریش‌لرینی سوره‌ب و ایتیشیچه، داعش دنیا و منطقه اوچون خطرلی دیر.
جنرال میلرنینگ کوپه‌یتیریشیچه، افغانستانده داعش گروهی میدیایی ریکلام‌لری، مالی حمایتی و عسکر آلیش جریانی کیسیلیشی کیره‌ک. اونینگ ایتیشیچه، افغانستان بوییچه داعش گروهی نینگ خراسان بولیمی، مذکور گروه نینگ سوریه ده بولگن اصلی گروهی بیلن علاقه‌ده دیر و تینچلیک توغریسیده کیلیشیلگن صورتده، طالبان گروهی جنگریلریدن بیرقطاری، داعش گه قوشیلیشی ممکن.
شونینگدیک، افغانستان مدافعه وزیرلیگی سرپرستی اسدالله خالدنینگ ایتیشیچه، کیله‌جک ییل کوکلم موسومی گچه دوشمن‌لر تینچلیک سیسی گه ایجابی جواب بیرمه‌گن صورتده، مملکت‌دن نابود ایتیله‌دی.
خالدنینگ کوپه‌یتیریشیچه، افغانستان چیت‌ایللیک کوچلرنینگ حضوری و اولرنینگ طالبان گروهی بیلن بولگن یقین علاقه‌سی جدی بیر تهدید دیر. خالدنینگ پاکستان گه اشاره قیلیب ایتیشیچه، حقانی ترماغی و باشقه تروریستی گروهلرنینگ یانیده کویته کینگشی، بو مملکت ده افغانستان اهالیسی گه قرشی فعالیت قیله‌دی.
مدافعه وزیرلیگی سرپرستی نینگ ایتیشیچه، پاکستان اوروش اوچقونی یالغیز افغانستان گه ایمس، بلکیم پاکستان و بوتون منطقه اوستیگه سلبی تأثیر قوییشی‌نی بیلگن بولسه کیره‌ک. اسدالله خالد گه کوره، آتیش‌کیسین بولمه‌گنده، هیچ بیر تینچلیک کیلیشووی ایجابی نتیجه بیرمه‌یدی.
ناتو تشکیلاتی گه اعضا مملکت‌لرنینگ مدافعه وزیرلرینی ایکی کونلیک ییغینی جمعه کون بروکسل‌ده یولگه قوییلیب و اوتگن کون یکونلندی.
اوشبو ییغینده افغانستان اوروشی و بو مملکت نینگ خوفسیزلیک کوچلریدن حمایت قیلینیشی بحث گه آلینگن.
