تشقی ایشلر وزیرلیگینینگ سیاسی معینینینگ بیلدیریشیچه، افغانستان حکومتی و طالبلر ارا بیرینچی رسمی تینچلیک اولتیریشده آتش قالدیریش بارهسیده بیرنرسه دییلمهگن، اما کیلگوسی اولتیریشده بوبارهده صحبت بولهدی.
شونینگدیک ایتیلیشیچه، ایکی تامان سهشنبه کونگی اولتیریشده هییت کونلریده آتش قالدیریش بارهسیده کیلیشگنلر.
افغانستان حکومتی بیلن طالبلر گروهینینگ بیرینچی رسمی تینچلیک سوزلهشیشلری شوهفته سهشنبه کونی پاکستان مری شهریده بولیب اوتدی. مذکور اولتیریشده طالبلرتامانیدن بیر اوچ کیشیلیک هیأت قتنشگن ایدی. بو اولتیریشده، امیریکه و چین اولکهلریدن هم نماینده کیلگن ایدی.
پاکستانده اوتکزیلگن تینچلیک سوزلهشیشلریده، افغانستان حکومتی تامانیدن تینچلیک یوکسک کینگشی عضوی و ننگرهار سابق والیسی قاری دین محمد، تشقی ایشلر وزیرلیگی سیاسی معینی حکمتخلیل کرزی، فرهادالله فرهاد، فیضالله ذکی، انجنیر عاصم و محمد ناطقیلر قتنشگن ایدیلر.
سرطان 18- ده حکمتخلیل کرزی، خبری ییغینده چیقیش قیلیب ایتیشیچه، مذکور اولتیریشیده ایکی تامان اوز ایستکلرینی لیست قیلیب بیراولریگه بیرهدی.
جناب کرزیگه کوره، کیلگوسی اولتیریشده بوتونلی طالبلر ایستکلری، جملهدن اساسی قانونگه اوزگریش کیلتیریش، مذکور گروه قماقدهگیلرینی قویب یوباریش و تشقی حربیلرنینگ اولکهدن بوتونلی چیقیشی اوچون سوزله شیلهدی. اونینگ ایتیشیچه، باید طالبلر اوز ایستکلری توغریسیده ضمانت بیریشلری هم ایتیلهدی.
افغانستاندن اشتراک ایتگن هیأت اعضالریدن بیری انجنیر عاصمنینگ خبری انجمنده ایتیشیچه، حاضرگه قدر طالبلربیلن کیلگوسی اولتیریش زمان و مکانی انیق ایمس، اما ایکی تامان مذکور اولتیریش تیزلیکده اوتیکزیلیشیگه تأکید قیلگنلر.
جناب عاصمگه کوره، تینچلیک سوزلهشیشلر برچه جزییاتی خلق خدمتیگه قویلهدی تا اونگه قرهتیب اولکه ایشاوچیلری تینچلیک برنامهسیدن حمایت قیلسهلر.
اونینگ ایتیشیچه، افغانستان حکومتی و طالبلر ارا کویته و حقانی ترماغینینگ کیلگوسی اولتیریشده قتنه شیشی بارهسیده هم بحث بولگن تا اولرهم حضور تاپسهلر.
افغانستان هیأتینینگ ینه بیر عضوی قاری دین محمد، تینچلیک بیرینچی اولتیریشیده، ایکی تامان روحیه سینی مثبت کورگنلیگی بارهسیده ایتیشیچه، رمضان هییتیدن کیین کیلهسی اوچرهشیشده، طالبلربیلن تفصیلی شکلیده صحبت ایتیلیشی کوتیلهدی.
گزارشلرگه کوره، مذکور اوچره شووده کوتیه کینگشینینگ نمایندهسی، جلالالدین حقانی ترماغی و ملامنصورلرهم قتنشگن ایکنلر.
ینه بیرتاماندن، اجراییه ریاستینینگ ترقهتگن خبرنامهسیگه کیلیشیچه، افغانستان تامانیدن طالبلر بیلن پاکستانده اوتکزیلگن مذاکرهده قتنشگن هیأت اعضاسی بوگون حکومت اجرایی ریاست باشلیغی عبدالله عبدالله بیلن هم اوچرهشگنلر.
جناب عبدالله طالبلر بیلن یوزمهیوز سوزلهشیشلرنی مثبت اوزگریش بیلهدی و اولکه ملی منافعسی و سونگی ییللردهگی یوتوقلرنی کوزگه توتیب، عدالتلی و دایمی تینچلیک کیلیشگه تأکید قیلدی.
