افغانستانده انسانلر اینیقسه بالهلر مملکت نینگ غربی چیگرهلریدن قاچاق بولیشهدی.
افغانستانده فرزندلری انسان قاچاقی گه قربان بولگن عایلهلردن بیرقطاری نینگ ایتیشیچه، بالهلری قاچاقچیلر تامانیدن الدهتیلیب و خطرلی یوللردن اوتکزیلگن، بیراق حاضرگهقدر اولرنینگ تقدیریدن هیچ بیر خبر یوق دیر.
یاش فرزندی انسان قاچاقی گه قربان بولگن آواره و کیکسه بیر آنهنینگ ایتیشیچه، فرزندی نینگ اوزاقلیگی اونی هرات شهری گه تارتگن و بو ییرگه کیلیب فرزندی دن بیران نشانه تاپیشینی ایستهیدی.
باسو آتلی اوشبو عیال هرات ولایتی نینگ شیندند تومنیدن بولهدی. اونینگ ایتیشیچه، حبیبالله آتلی فرزندی 4 ییل آلدین شیندند دن ایران گه و ایران دن ترکیه کیتگن، بیراق حاضر اوندن هیچ بیر خبر یوق دیر و فرزندی نینگ اوزاقلیگی اونینگ بیلینی بوکیتگن.
اوشبو کیکسه آنه بیلی بوکهییب هر کوچه و میدیالرگه باش اوریب فرزندی دن بیران خبر کیلیشینی کوتهدی.
«تورت ییل جریانیده کوپلب زحمت چیکدیم، فرزندلریم کیچیک ایدیلر، باشقهلرنینگ نانی گه اوسدیردیم، حاضر قییرده بولگنینی بیلمهیمن، تینگریم رحم قیلسین و او تاپیلسین.»
خانم باسونینگ ایتیشیچه، فرزندی نینگ 700 مینگ افغانی مهریه بیلن نشانلهگن و فرزندی اوشبو مبلغ نی تاپیش اوچون ایران کیتگن ایکن.
مذکور عیال نینگ ایتیشیچه، اوغلی بیر ییل ایرانده ایشلهگنیدن سونگ، انسان قاچاقچیلری تامانیدن الدهنیب و کوپ آرزو و ایستک بیلن ترکیه کیتگن.
بو آنه نینگ ایتیشیچه، اوغلی ترکیه کیتگنیدن 3 ییل اوتماقده، بیراق حاضرگچه اونینگ «تیریکلیگی یا-ده اولگنیدن» هیچ بیر خبر یوق دیر.
هرات ولایتی بوییچه انسان حقلری کمیسیونی نینگ ولایتی دفتری نی بالهلر بولیمی مسؤولی میرویس امینی نینگ ایتیشیچه، مملکت نینگ غربی ولایتلرینی چیگرهلریده انسان قاچاقی اینیقسه بالهلر قاچاقی دواملی شکلده یوز بیرهدی.
جناب امینی نینگ ایتیشیچه، جاری ییل باشلنگنیدن بویان 250 قیز شامل 1600 باله ایران بارهدیگن چاغیده، اسلامقلعه و نیمروزدن رد ایتیلگن.
اونگه کوره، بو بالهلردن کوپینچهسی اچیق تجربهلرنی باشلریدن کیچیریشگن و بو ایسه انسان حقوقی 43% نقض ایتیلگنینی کورستهدی.
هرات ولایتیده مهاجرلر و باشپناه ایزلاوچیلر ریاستی باشلیغی جاوید نادم، انسان قاچاقی اینیقسه بالهلر قاچاقیدن خواطر بیلدیریب ایتیشیچه، هر کون اسلامقلعه چیگرهسیدن 4 دن باشلب 15 گچه باله رد ایتیلهدی و اولردن کوپینچهسی قاچاقچیلر تامانیدن الدهنیب و ایران باریش گه قصد قیلیشهدی.
شونینگدیک، هرات محلی رسمیلری، بو ولایتده انسان قاچاقچیلرگه قرشی جدی شکلده یاندهشیلیدن خبر بیریب ایتیشیچه، اوتگن بیر ییل جریانیده قاچاقچیلردن بیرقطاری، مذکور ولایت نینگ خوفسیزلیک کوچلری تامانیدن قولگه آلینگن.
شو توغریده…
انسان قاچاقی؛ بیگارلیک، قیناق و آغیر ایشلردن سونگ، صفرگه قیتگن ییگیتنینگ حکایهسی
