مملکت معارف وزیرلیگی، مکتبلر، اورگهتیش ادارهلر رقمی و درس صفتی قندهی بولگنلیگینی تیکشیریش اوچون نورستان ولایتیگه هیأت جونتگن.
بو بیرینچی مرته نورستان ولایتیده اوقووچیلر و مکتبلر رقمی هیأت تامانیدن تیکشیریلهدی.
اوشبو هیأت باشلیغی شاه سیدالکوزی نینگ سلام وطندارگه ایتیشیچه، بو ایش معارف وزیرلیگی یوزکونلیک برنامهسیگه کیرهدی.
جناب الکوزیگه کوره، دستلب مکتبلر تشکیلاتی رویخطگه آلینهدی، اوقووچیلر سانی انیقلنگندن کیین، قولگه کیلگن رقم مرکزی ادارهده رویخطگه آلینگن حسابات بیلن ماسلشتیریلهدی.
نورستان ولایتیده معارف ریاستی رسمی لری، هیأتلر قیلهجیک ایشی درس توغریسیده ایجابی بولگن لیگیگه ایشانچ بیلدیریشلریچه، مذکور هیأت ایشی اولرنینگ فعالیتلریگه ایجابی تاثیر تشلهیدی.
نورستان ولایت معارف ریاستی مسؤولی قدرت الله عطایی نینگ ایتیشیچه، نیچه مرته معارف وزیرلیگیدن نورستانگه معارف فعالیتلرینی شفافلشتیریش اوچون بو ولایتگه هیأت یوباریشینی سوره گن، حاضر ایسه بو هیأت کیلیشی بیلن، مذکور ولایت معارف تیزیمی اوزگریشیگه گواه بولهدی.
نورستانده مدنی جماعهچیلیک فعاللری معارف وزیرلیگینینگ بو ایشینی خوش قرشیلب ایتیشیچه، مذکور هیأت کیلیشی بیلن معارف ریاستیگه اداری فساد یوقالیشیگه امید وارلر.
نورستان ولایتی معارف ریاستی مسؤوللری گه کوره، مذکور ولایتده 234 مکتب موجود، مکتبلردهگی 58 مینگ اوقووچیگه 1339 اوقیتووچی آرقهلی درس بیریلهدی.
نورستان ولایتی نینگ فقط ایگیل تومنیده 12 مکتب ایشیگی اوقووچیلر یوزیگه یاپیق قالماقده. باشقه مکتبلر ایسه عادی شکلده اوز فعالیتیگه دوام بیرهدی.
اوتکن هفته، افغانستان بوییچه امیریکهنینگ خاص تیکشیروچی دفتری (SIGAR) افغانستان معارف وزیرلیگیده امیریکه قوشمه ایالتلری یاردملری تیکشیریلیشینی سورهگن ایدی. بو اداره نینگ ایتیشیچه، معارف وزیرلیگی رسمیلری اصلده موجود بولمهگن اوقوتووچیلر و مکتبلر نامیگه، کوپ پولنی اوز چونتکلریگه اورگنلر.
