مملکت غربی‌ده‌گی امنیتی رسمی‌لرنینگ ایتیشیچه، افغانستان امنیتی کوچلری‌نینگ سونگی ایکی آی دوامی‌ده اوتکزگن عملیات‌لری نتیجه سیده هرات، فراه، غور و بادغیس ولایت‌لریده 400 طالب هلاک بولگن.
بو عملیات‌لر مملکت غربی‌ده گی ولایت‌لر 39 تومنی‌ده اویوشتیریلگن و اونگه 350 طالب هم تن جراحت آلگن.
مملکت غربی ده‌گی 207 ظفر قول اردوسی‌نینگ باشلیغی تاج محمد جاهد، اوتکن پنج‌شنبه کونگی خبری ییغینی‌ده چیقیش قیلیب ایتیشیچه، بو طالب‌لر افغانستان امنیتی کوچلر آرقه‌لی 32 بیرلیک عملیاتی جریانی‌ده هلاک و تن جراحت آلگن.
جناب جاهدگه کوره، شونینگ‌دیک بو عملیات‌لرده پارتلاوچی ماده، قورال و نقلیه واسطه‌لرهم امنیتی کوچلر قولیگه توشگن.
جناب جاهدنینگ کوپه‌یتیریشیچه، طالب‌لرگه ایتکیزیلگن تلفاتلردن کوپی‌سی فراه ولایتی‌نینگ بالابلوک، گلستان و پشت‌رود، غور ولایتی‌نینگ چهارسده و بادغیس ولایتی‌نینگ بالامرغاب تومن‌لریده بولگن.
عین حالده، هرات پولیسی باشلیغی عبدالمجید روزی‌نینگ مذکور ییغین‌ده ایتیشیچه، مملکت غربی‌ده افغانستان امنیتی کوچلری تمانیدن یولگه قوییلگن 32 عملیات جمله سیدن، 12 عملیات هرات‌ده یولگه قوییلگن نتیجه‌ده 60 طالب هلاک ایتیلگن.
هرات پولیسی قومندانی‌نینگ کوپه‌یتیریشیچه، شونینگ‌دیک 51 عصیانچی و اختطاف‌چی شهر ایچیدن توتقونگه آلینگن.
طالب‌لر اوتکن ایکی آی جریانی‌ده، نیچه مرته مملکت غربی‌ده بیرقطار تومن‌لر اوستی‌گه گروهی شکل‌ده هجوم اویوشتیردی و بادغیس ولایتی‌نینگ بالامرغاب تومنی ایکی کون گروه قولیگه ایدی.
شونینگ‌دیک امنیتی کوچلر، بدخشان، کندز، فاریاب و هلمند ولایت‌لریده طالب‌لر بیلن توقنشگن.
