ساغلیک وزیرلیگی نینگ ایتیشیچه، اوتگن 24 ساعتده کرونا ویروسی گه شبههلی 529 واقعه تیکشیریلگن کیم اولردن 253 کیشی نینگ نتیجهسی ایجابی انیقلنگن.
بوگون (شنبه 20- ثور) مذکور وزیرلیک ساغلیک خدمتلر ترقهتیش معینی وحید مجروح خبری بیر ییغین اوتکزیب ایتیشیچه، اوتگن بیر کیچه-کوندوز ده 71 کیشی هرات، 43 کیشی بلخ، 39 کیشی ننگرهار، 24 کیشی تخار، 22 کیشی جوزجان و 16 کیشی پکتیاده بو ویروس گه چلینگن.
شونینگدیک، 11 کیشی قندوز، 11 کیشی لغمان، 8 کیشی غزنی، 4 کیشی کابل و باشقه بیر بیر کیشی نورستان، کنر، پنجشیر و بامیان ده بو ویروس گه چلینگنی انیقلنگن.
جناب مجروح نینگ کوپهیتیریشیچه، اوتگن بیر کیچه – کوندوز ده مذکور ویروس گه چلینگن 6 کیشی هلاک و باشقه 29 کیشی ایسه دارولنگن.
اوشبو ینگی واقعهلر قید ایتیلیشی بیلن مملکتده کرونا (کووید 19) ویروس گه چلینگنلر رقمی 4033 کیشی گه ییتیشدی. بولردن حاضرگچه 115 کیشی جان بیرگن و باشقه 502 تهسی دارولنگن.
مجروح گه کوره، حاضرگچه 392 ساغلیک ایشلاوچیسی کرونا گه چلینگن کیم اولردن قطاری دارولنگن و باشقه قطاری ایسه اویلریده قرنطین قیلینگن.
ساغلیک وزیرلیگی مسئوللری، کرونا گه چلینگن مذکور وزیرلیک وزیری فیروزالدین فیروز نینگ ساغلیک وضعیتی نی کوپ یخشی دیدیلر.
دنیا ده کرونا ویروسی گه چلینگنلر رقمی 4 میلیون و 138 مینگدن آرتیق کیشی گه ییتیشگن. بولردن 276 مینگدن آرتیغی هلاک و باشقه بیر میلیون و 385 مینگدن آرتیغی دارولنگن.
