افغانستان بوییچه ملی بیرلیک حکومتی نینگ بیش ییللیک دوریده مملکت بویلب کمیده 2331 شرکت ناتینچلیک، پروژه یوقلیگی، خصوصی بولیمدن حمایت قیلینمهگنی، برق بهاسی یوقاری بولگنی و خادم ماده یوقلیگی باعث، باغلنگن.
سلاموطندار میدیا ترماغی نینگ خبرچیلری اوشبو شرکتلر و ایشخانهلردن دقیق رقم قولگه کیریتیشلری اوچون مملکت بویلب ولایتلرنینگ مسؤوللرینی آرقهسیدن باریشگن. بو گزارشده هر بیر ولایت نینگ مسؤوللری بیلن باغلنگن شرکتلر و ایشخانهلرنی توغریسیده صحبت اوتکزیشیب رقمی و سببی نی مشخص قیلیشگن.
مرکزی ولایتلر
کابل: افغانستان بوییچه صناعت و سوداگرلیک اتاقلرینی اورین باسری خانجان الکوزی، کابلدهگی فعال شرکتلردن دقیق رقم بیرمهیدی، بیراق ایتیشیچه، سونگی ییللرده مینگلرچه شرکت نینگ جوازی ناتینچلیک و پروژه یوقلیگی باعث، بیکار قیلینگن. اونگه کوره، ایکی ییل آلدین کمیده 5 مینگ شرکت باشکینت بوییچه صناعت و سوداگرلیک اتاقلریده رویخطگه آلینگن ایکن.
میدانوردک: میدانوردک حاکمی سوزلاوچیسی محبالله شریفزی نینگ ایتیشیچه، اوتگن بیش ییلده بو ولایتده هیچ بیر شرکت و ایشخانه بیکار یا-ده باغلنمهگن. جناب شریفزی گه کوره، قیینچیلیک یوز بیرگن حالتده میدانوردک محلی رسمیلری سرمایه یاتقزووچیلر و شرکتلرنینگ ایگهلری گه یاردم بیرهدی.
لوگر: لوگر حاکمی سوزلاوچیسی دیداراحمد لونگ نینگ سلاموطندارگه ایتیشیچه، بو ولایتده فعال و غیرفعال شرکتلر توغریسیده دقیق تیرگاو اوتکزیلمهگن. عین دمده، جناب لونگ نینگ ایتیشیچه، لوگرده خصوصی شرکتلر اقتصادی قیینچیلیکلرگه روپهره بولیشگن و بو شرکتلر اوچون فعالیت قیلیش کون اوتیشی بیلن قیین بولهدی.
پروان، پنجشیر و کاپیسا: پروان ولایتی بوییچه صناعت و سوداگرلیک آمری عبدالبصیر هاشمی نینگ ایتیشیچه، اوشبو آمریت پروان، کاپیسا و پنجشیر ولایتلری نینگ صناعتی، تولیدی و سوداگرلیک شرکتلری نینگ سوداگرلیک جوازلرینی ترقهتیش، قیته تیکلش و ینگیلشتیریش گه مسؤول دیر. جناب هاشمی گه کوره، اوتگن 5 ییلده مذکور 3 ولایتده 25 شرکت فعالیت دن قالگن. بو آرهدن 7 ایری جواز پروان ولایتیدن، 7 ایری جواز کاپیسا ولایتیدن و 11 جواز پنجشیر ولایتیدن فعالیتلری بیکار قیلینیشینی سورهشگن.
بامیان: بامیان ولایتی بوییچه مستوفیت مسؤوللری نینگ ایتیشیچه، بو ولایتده 186 خصوصی شرکت فعالیت قیلهدی. بامیان شرکتلرینی بهالش مدیری عاتکه رضایی نینگ ایتیشیچه، بامیان نینگ مستوفیت ادارهسیده رویخطگه آلینگن 186 شرکتدن 9 تهسی فعالیت جوازلرینی بیکار قیلیشگن و شونینگدیک، بو ولایتده بولگن 86 بنا قوریش شرکتدن 33 تهسی فعالیت قیلمهیدی. اونگه کوره، ییلده بو ولایتده 8 یا-ده 9 شرکت و ایشخانه باغلنهدی.
.png)
غرب حوزهسی
بادغیس: بادغیس ولایتی بوییچه صناعت و سوداگرلیک اتاقی اورین باسری معراجالدین نینگ ایتیشیچه، ملی بیرلیک حکومت دورهسیده 80 دن آرتیق خصوصی شرکت پروژه یوقلیگی و ملی بیرلیک حکومت تامانیدن حمایت قیلینمهگنلری باعث، سوداگرلیک جوازلرینی بیکار قیلیشگن؛ بوندن آلدین بادغیس ولایتیده کمیده 200 شرکت فعالیت قیلر ایکن.
نیمروز: نیمروز ولایتی بوییچه صناعت و سوداگرلیک اتاق اورین باسری محمدنبی نعیمی نینگ ایتیشیچه، سونگی ییللر جریانیده نیمروز ولایتیده لوله ایشلب چیقرووچی بیر شرکت فعال قیلر ایکن، بیراق شو شرکت هم برق بهاسی یوقاری بولگنی باعث، کابل گه انتقال بیریلگن. جناب نعیمی گه کوره، بیسکویت ایشلب چیقرووچی کمیده 10 کیچیک شرکت هم برق بهاسی یوقاری بولگنی باعث، باغلنگن.
غور: غور ولایتی بوییچه اقتصاد ریاستی سرپرستی محمدیاسین سلطانی نینگ ایتیشیچه، اقتصاد ریاستیده کمیده 55 بنا قوریش شرکت و 42 لوژیستکی شرکت رویخطگه آلینگن. بیراق بو شرکتلر اقتصادی قیینچیلیک باعث، اونچهلیک فعالیت قیلیشمهیدی. اونینگ ایتیشیچه، اوتگن بیش ییل جریانیده یالغیز 6 شرکت نینگ حجتی ساخته بولگنی باعث، فعالیتلری توختهتیلگن.
هرات: هرات ولایتی بوییچه کانلر و صناعت اتاقی اورین باسری سیدخلیل قتالی نینگ ایتیشیچه، هرات ولایتی نینگ صناعتی شهرچهسی 1381- ییلده ایجاد ایتیلگن و بو شهرچهده 400 دن آرتیق شرکت فعالیت قیلهدی. جناب قتالی نینگ ایتیشیچه، سونگی ییللر جریانیده کمیده 100 شرکت تورلی سببلر جملهدن اقتصادی قیینچیلیکلر باعث، بو ولایتده فعالیتلرینی توختهتیشگن.
.png)
شمال حوزهسی
بغلان: بغلان ولایت مستوفیسی عبدالهادی باورنینگ ایتیشیچه، بغلان مستوفیت ادارهسیگه 423 شرکت قید ایتیلگن کیم بولردن 72 شرکت غیرفعال و باشقه 135 شرکت نیچه مدتدن بویان مستوفیت ادارهسیگه مراجعت قیلمهگن.
سمنگان: سلاموطندارگه صحبت بیرگن سمنگان ولایتی عواید آمری داوود خالقیارنینگ ایتیشیچه، مذکور ولایتدهگی خصوصی شرکتلردن 30 فایزی باغلنگن. بو شرکتلردن کوپینچهسی لوژستیکی، سیاحتی و قوریش شرکتی بولگن.
بلخ: بلخ ولایتی نینگ صناعت و سوداگرلیک اتاقی باشلیغی شیراحمد سپاهیزاده نینگ ایتیشیچه، سونگی ییللرده خوفسیزلیک تهدیدلر، خام مواد یوقلیگی و برق خرهجتی یوقاری بولگنی باعث 123 خصوصی شرکت ایشدن قالگن. بلخ ولایتیده 2014- ییل گچه 300 شرکت فعالیت قیلهدی ایدی.
بیراق بلخ ولایتی نینگ کانلر و سوداگرلیک ادارهسی باشلیغی محمدیاسین اکبری نینگ ایتیشیچه، بو رقم موقت شکلده باغلنگن شرکتلرنینگ رقمی دیر و بولر تیزلیکده قیتهدن فعال بولیشی ممکن.
قندوز: قندز ولایتی نینگ صناعت و سوداگرلیک ادارهسی باشلیغی غلامعلی عیدیزاده نینگ ایتیشیچه، ۹۵،۹۶،۹۷،۹۸- ییللرده 60 سوداگرلیک شرکت ایش جوازی نی لغو قیلگن. جناب عیدیزاده گه کوره، ناتینچلیک و تهدیدلر باعث سوداگرلر شرکتلری نینگ جوازی نی لغو قیلگن.
فاریاب: سلاموطندارگه صحبت بیرگن فاریاب صناعت و سوداگرلیک ادارهسی باشلیغی نصیر عظیمی نینگ ایتیشیچه، ملی بیرلیک حکومتی جریانیده 60 دن آرتیق خصوصی شرکت ایشدن قالگن. جناب عظیمی گه کوره، فاریاب ولایتیده 43 کیچیک شرکت، 14 کتته شرکت و 5 خصوصی شرکت سکتوری ایشدن قالگن.
تخار: تخار اقتصاد ریاستی باشلیغی ضیاء طارق نینگ ایتیشیچه، تخار ولایتیده ایشلب چیقارهدیگن کتته شرکت موجود ایمس و یالغیز کیچیک شرکتلر یاغ، اون و پلاستیک ایشلب چیقاریش و توز تازهلشی خصوصیده فعالیت قیلهدی. جناب طارق نینگ ایتیشیچه، تخارده 170 شرکت مذکور بولیملرده عادی شکلده فعالیت قیلهدی.
جوزجان: جوزجان ولایتی نینگ صناعت و سوداگرلیک اتاقی باشلیغی یولبرس عطایی نینگ ایتیشیچه، مذکور ولایتدهگی خصوصی شرکتلردن 50 فایزی ناتینچلیک باعث باغلنگن. جناب عطایی گه کوره، جوزجان 98- ییلده سوداگرلیک اتاقی اعضالیگی نی قولگه کیلتیردی و 174 شرکت اونگه قید ایتیلدی، بیراق 72 شرکت نینگ ایگهلری شرکتلری نینگ جوازی لغو ایتیلیشی نی سورهگنلر.
سرپل: سرپل حاکمی سوزلاوچیسی ذبیحالله امانی نینگ ایتیشیچه، سرپل ولایتیده صناعت و سوداگرلیک ریاستی موجود ایمس و شونینگدیک محلی مسئوللرنینگ ایتیشلریچه، باغلنگن شرکتلردن بیللی رقم قولگه یوق و بو ولایتده نیچه شرکت فعال و فعال ایمسلیگی توغریسیده معلوماتلری یوق دیر.
.png)
جنوب حوزهسی
هلمند: هلمند ولایتی بوییچه سوداگرلر بیرلیگی باشلیغی علیاحمد ناصری نینگ ایتیشیچه، حامد کرزی حکومتی نینگ دوریده بو ولایتده 900 شرکت فعالیت قیلر ایکن، بیراق حاضر بو ولایتده یالغیز 30 شرکت فعالیت قیلهدی؛ بو شرکتلردن بیرقطاری نینگ فعالیتی توختهتیلگن و باشقه بیر قطاری ایریم دلیللر باعث، کابل و باشقه ولایتلرگه انتقال بیریلگن.
قندهار، زابل، ارزگان: جنوب حوزهسینی صناعت و سوداگرلیک ریاست مسؤولی علاوالدین حمیدی نینگ ایتیشیچه، سونگی اوچ ییل جریانیده قندهار، زابل و ارزگان ولایتلریده 2931 شرکت و 1500 کیشی جواز بیریلگن. جناب حمیدی نینگ ایتیشیچه، اوتگن بیش ییلده خصوصی شرکتلرنینگ 203 جوازی مذکور ریاست تامانیدن بیکار قیلینگن.
غزنی: غزنی ولایتی بوییچه صناعت و سوداگرلیک اداره باشلیغی حسین عارفی نینگ ایتیشیچه، سونگی بیش ییل ده چمهسی 72 شرکت فعالیت جوازلرینی بیکار قیلیشگن. جناب عارفی گه کوره، مذکور ولایتده خصوصی بولیم فعالیتی گه قرشی اینگ اساسی قیینچیلیک ناتینچلیک دیر.
.png)
شرق حوزهسی
ننگرهار: ننگرهار ولایتی بوییچه صناعت و سوداگرلیک ریاست باشلیغی خالد گردیوال نینگ ایتیشیچه، ملی بیرلیک حکومت دوریده 2000 – 2500 جواز سوداگرلیک شرکتلریگه توزیع قیلینگن. جناب گردیوال گه کوره، بو مدتده 250 شرکت اوز جوازلرینی بیکار قیلیشگن.
کنر: کنر ولایتی بوییچه صناعت و سوداگرلیک ریاست باشلیغی عبدالبصیر ساپی نینگ ایتیشیچه، سونگی نیچه ییل جریانیده 240 شرکت بو ولایتده فعالیت قیلیش جوازی قولگه کیریتگن و 16 شرکت جوازلرینی بیکار قیلگن.
پکتیا: پکتیا ولایتی بوییچه صناعت و سوداگرلیک اتاق باشلیغی نصیر علمیار نینگ ایتیشیچه، پکتیا ولایتیده 600 خصوصی شرکت موجود دیر و اولردن 70 تهسی مالیات بیرمهگنی باعث، اوتگن 5 ییل جریانیده باغلنگن.
لغمان: لغمان محلی مسووللری نینگ ایتیشیچه، لغمان ولایتیده صناعت و سوداگرلیک وزیرلیگی نینگ نمایندهلیگی یوق و خصوصی شرکتلر توغریسیده معلومات بیرهدیگن باشقه بیرلشمه یا-ده خصوصی نهاد هم موجود ایمس.
پکتیکا: پکتیکا ولایتیده صناعت و سوداگرلیک اتاق مسووللری نینگ ایتیشیچه، سونگی ییللرده 300 شرکت اوشبو ولایتده تورلی بولیملرده فعالیت قیلردی، بیراق 165 شرکت باغلنگن. اوشبو ولایتده صناعت و سوداگرلیک اتاق باشلیغی طلاخان ذهین نینگ ایتیشیچه، 150 خصوصی شرکت آیسا ادارهسی گه قوشیلگن و باشقه 15 شرکت اقتصادی قیینچیلیک باعث، باغلنگن.
نورستان: نورستان محلی مسووللری نینگ ایتیشیچه، اوشبو ولایتده صناعت و سوداگرلیک اتاقی نینگ نمایندهلیگی یوق و بو ولایتده خصوصی شرکتلرنینگ رقمی خصوصیده توغری رقم بیریلمهگن.
فراه، بدخشان، دایکندی و خوست ولایتلری نینگ محلی رسمیلری بو توغریده صحبت بیرمهگن و شونینگدیک، بوتوغریده سلاموطندار خبرچیلری نینگ سعی و حرکتلری نتیجهسیز قالگن.
