ملګرو ملتونو د امریکا-طالبانو سره د تړون، د طالبانو او القاعده ترمنځ د اړیکو او په افغانستان کې د داعش او نورو بهرنیو جنګیالیو د موجودیت په اړه تازه راپور خپور کړی او په کې ویل شوي چې د طالبانو په منځ کې د سولې او له امریکا سره د تړون په اړه مختلف نظرونه موجود دي او داسې نه ښکاري چې دا تړون دې کامیاب شي.
راپور زیاتوي، د طالبانو په منځ کې د "حزب ولایت" په نامه یوه نوې ډله جوړه شوې چې د امریکا-طالبانو ترمنځ د سولې د لاسلیک شوي تړون خلاف ده او دغه راز ځینو نورو طالب جنګیالیو هم د دغه تړون خلاف خپله لاره بېله کړې او له دې پلوه د طالب مشرانو په منځ کې اختلافات پیدا شوي دي.
د امنیت شورا راپور کې دا هم راغلي چې په قطر کې د طالبانو مشرانو هم له امریکا سره د تړون ټول جزیات خپلو جنګیالیو ته نه دي خپاره کړي.
د ملګرو ملتونو په دغه راپور همدغه راز د طالبانو او القاعده په اړیکو هم خبرې شوي او ویل شوي دي چې دا دواړه ډلې لا هم د یو بل سره اړیکي پالي او د القاعده لوړ پوړي مشران لا هم افغانستان کې دي.
د راپور پر بنسټ د القاعده ډله د افغانستان په ۱۲ ولایتونو کې فعالیت لري او د ۴۰۰ او ۶۰۰ ترمنځ جنګیالي لري.
راپور وايي چې طالبانو د امریکا سره د سولې د تړون پر مهال په دوامداره توګه د القاعده ډلې سره سلا مشورې کولې او هغوی ته یې ډاډ ورکړی چې تاریخي روابط به ورسره پالي.
د ملګرو ملتونو راپور وايي چې دا مهال د ۸۰۰۰ او ۱۰۰۰۰ ترمنځ بهرني جنګیالي هم په افغانستان کې موجود دي چې ۶۵۰۰ یې پاکستانیان دي.
د ملګرو ملتونو په راپور کې ویل شوي چې استخباراتي معلومات ښيي چې حقاني شبکه په کابل کې د داعش ډلې لپاره د بریدونو امکانات برابر کړي او داعش ډله په یوازې ځان د پېچلیو بریدونو توان نهلري.
د ملګرو ملتونو دا راپور داسې مهال خپرېږي چې افغان حکومت او طالبان د یو بل بندیان خوشې کوي او هلې ځلې رواني دي چې بین الافغاني مذاکرات پیل شي او په افغانستان کې دایمي سولې ته لار پرانیستل شي.
