په افغانستان کې د ملګرو ملتونو د منشي ځانګړی استازی وايي، سره له دې چې د فساد پر وړاندې د مبارزې په برخه کې جدي خنډونه شته؛ خو په دې برخه کې افغان حکومت ښه پرمختګ کړی دی.
ملګرو ملتونو د سه شنبې په ورځ په افغانستان کې د اداري فساد په اړه خپل تازه راپور خپور کړ.
په افغانستان کې د دغه سازمان د منشي ځانګړي استازي تدامیچي یاماموتو وايي، په افغانستان کې د فساد له منځه وړلو لهپاره ډېر وخت ته اړتیا ده او نړیواله ټولنه په دې برخه کې په راتلونکې کې هم، همکاري کوي.
یاماموتو وویل، دا د اجرایويي، قضايي او مقننې قوې د ګډو هڅو لاسته راوړنه ده.
په همدې حال کې د عدلیې وزیر عبدالبصیر انور په افغانستان کې د فساد پر وړاندې د جدي مبارزې خبر ورکوي او زیاتوي، حکومت د فساد پر وړاندې د مبارزې لهپاره د روښنایۍ پرګرام په پام کې لري.
دغه راز د ملګرو ملتونو ځانګړی استازی په امنیتي بنسټونو کې د اداري فساد په موجودیت جدي اندېښنه ښيي او وايي، دغه بنسټونه باید په جدي توګه وپلټل شي.
د ملګرو ملتونو د سازمان ځانګړي استازي له افغان حکومت وغوښتل، چې په دې برخه کې دې جدي ګامونه پورته او زورواکو ته دې اجازه نه ورکوي، چې د اصلاحاتو مخه ونیسي.
