د ملګرو ملتونو په کلني راپور کې راغلي، چې په تېر ۲۰۱۴ کال کې دجګړو له امله د ملکي تلفاتو شمېر ۲۲ سلنه زيات شوی.
دغه راپور په افغانستان کې د ملګرو ملتونو مرستندويه پلاوي (يوناما) او د بشري حقونو له پاره د ملګرو ملتونو عالي کمېشنرۍ په همغږۍ ترتیب شوی.
راپور په وسله واله جګړه کې د ملکي تلفاتو د ساتنې په نوم خپور شوی دی.
په ۲۰۱۴ کال یوناما د ملکي وګړو ۱۰۵۴۸ تلفات مستند کړي، چې له ۲۰۰۹ کال راهیسې د يو کال په موده کې د ملکي وګړو د مرګ ژوبلې تر ټولو لوړه شمېره ده.
راپور وايي په ۲۰۱۴ کال کې د ځانمرګي بريدونو زياتوالی او د افغان ځواکونو او مخالفو وسله والو ترمنځ مخامخ جګړه کې پرته له دې، چې ملکي ځايونه په پام کې ونيول شي د وسلو استعمال ملکي تلفاتو د زياتوالي یو عمده لامل دی.
د افغانستان لپاره د ملګرو ملتونو د سرمنشي ځانګړي استازي او د يوناما د پلاوي مشر نيکولاس هیسم د چهار شنبې په ورځ ( سلواغې ۲۹مه) وايي؛ ځای پر ځای شوي مايونونه، ځانمرګي بريدونه او د افغان ځواکونو او وسله والو ترمنځ مخامخ جګړه ملکي وګړو ته درنه مرګ ژوبله اړولې ده.
راپور زياتوي، چې ډیره مرګ ژوبله د دولت مخالفو وسله والو له لوري ملکي وګړو ته اوښتې.
د يوناما راپور دا په ګوته کوي، چې د ټولو ملکي تلفاتو ۷۱ سلنه د دولت ضد عناصرو او ۱۴ يې د دولت پلوه ځواکونو ته منسوب ده او په دغو کې بیا ۱۲ سلنه د افغان ځواکونو او دوه سلنه يې د نړېوالو ځواکونو له لوري ترسره شوي.
یوناما وايي، کله چې نړېوال ځواکونه خپل هوايي ملاتړ د افغانستان څخه واخیست، نو په دغه هېواد کې ځمکني عمليات هم زيات شول.
د دولت ضد عناصرو له خوا هدفي وژنې د ملکي وګړو د مرګ ژوبلې ۱۱ سلنې سبب شوې دي او یوناما د ۱۱۱۴ ملکي وګړو تلفات ثبت کړي دي، چې د ۲۰۱۳ کال په پرتله پنځه سلنه کموالی ښايي.
په هدفي وژنو کې، ملا امامان، قومي مشران، د دولت مامورين او عدلي او قضايي مامورينو وژنې شاملې دي.
راپور کاږي، چې ټولټال په ۲۰۱۴ کال کې د ملکي تلفاتو څلور سلنه يې له جګړې پاتې چاوديدونکو توکو له امله منځه ته راغلي.
