د ملي امنیت شورا وايي چې طالبانو په تېره یوه میاشت کې ۱۲۹ ملکیان وژلي او ۲۹۱ نور یې ټپیان کړي دي.
د ملي امنیت شورا دفتر نن په یوه خبرپاڼه کې لیکلي چې طالبانو د تېرې یوې میاشتې پر مهال په ۳۰ ولایتونو کې ۱۴۵۶ بریدونه کړي چې له کبله یې ۱۲۹ ملکیان وژل شوي دي.
د خبرپاڼې له مخې، طالبانو د تاوتریخوالي کمولو په اړه له ژمنې سره سره ډېری بریدونه د ښارونو په مرکزونو او لویو لارو کې کړي دي.
خبرپاڼه زیاتوي، طالبانو تر ټولو ډېره مرګژوبله د سمنګان، ننګرهار او کندهار اوسېدونکو ته اړولې ده.
د ملي امنیت شورا دفتر ویلي، طالبانو د چاودنو او ځانمرګو بریدونو ترڅنګ، هدفي وژنو او د چسپکي ماینونو الوځولو ته هم مخه کړې چې ډېری قربانیان یې ملکیان دي.
خبرپاڼه لیکلي، د ملکیانو موخه ګرځول د جګړهییزو قوانینو خلاف کار او جګړهییز جنایت بلل کېږي.
خو طالبانو بیا د ملکیانو د وژلو توجیه کولو لپاره ویلي چې ډله یې له جګړې پرته بله لار نه لري او د تاوتریخوالي کمولو او جګړې پای ته رسولو لپاره یې باید بندیان خوشې شي.
دا په داسې حال کې ده چې د امریکا د ملي امنیت شورا سلاکار رابرټ اوبراین له ولسمشر محمداشرف غني او د ملي مصالحې له رییس عبدالله عبدالله سره د ټیلیفوني خبرو له لارې د طالبانو له لوري د تاوتریخوالي زیاتوالی د اندېښنې وړ بللی او ویلي یې دي چې د تلپاتې سولې راتلو لپاره باید تاوتریخوالی ودرېږي.
