.jpg)
افغانستان ژورنالیستلر ملی بیرلشمه‌سی بوگون (سه‌شنبه) «معلوماتلرگه قول تاپیش اوچ‌بورجگی» نامی آستیده ییغین اوتکزدی. کابل‌ده اوتکزیلگن اوشبو ییغین‌دن اساسی نیت خبرچیلرنی حمایت قیله‌دیگن اداره‌لر، حکومت و معلوماتلرگه قول تاپیش کمیسیون اورته‌سیده کوپراق هماهنگلیک یره‌تیش دییلگن.
افغانستان ژورنالیستلر ملی بیرلشمه‌سی نینگ اجراییه باشلیغی فهیم دشتی، هنوز هم دولت اداره‌لریده خبرچیلرگه معلومات بیرمسلیک مدنیتی همان ایسکی حالده قالماقده دیگن. جناب دشتی، دموکراتیک و زمانوی معیارلرگه کوره، حکومتلر معلومات‌نی ایگه‌سی ایمس؛ بلکه اونی سقلاوچیلر دیر.
معلوماتلرگه قول تاپیش قانونی‌گه موافق دولت نینگ هر بیر اداره‌سی معلومات بیریش‌گه مجبور؛ اما، ملی بیرلیک حکومتی هنوزگچه بو توغریده هیچ قنده‌ی عملی آدیم کوتارمه‌گن دیدی جناب دشتی.
افغانستان‌ده آزاد مطبوعات حمایتی بیلن مشغول «نی» اداره‌سی‌نینگ باشلیغی مجیب خلوتگر، حکومت ییتکرمه‌لرگه معلومات بیریش‌دن دایم باش تارتیب کیلگن لیگی‌گه اشاره قیلگن. هنوز هم مهم معلوماتلر جمله‌دن ترورچیلیک ینه ییریک فسادگه عاید معلوماتلرنی حکومت ییتکرمه‌لرگه بیریش نی ایسته‌مه‌یدی دیگن جناب خلوتگر.
لیکن، افغانستان جمهور رییسی سوزلاووچیسی نینگ اورین باسری دواخان مینه‌پال، حکومت خبرچیلر قیین‌چیلیگینی حل قیلیش اوچون بیرگن وعده‌سی‌گه عمل قیله‌دی دیدی. اساسی قانون‌گه موافق حکومت خبرچیلرگه معلومات بیریش اوچون مجبور دیگن او.
بوندن چمه‌سی بیش آی آلدین مملکت رهبری محمد‌اشرف غنی ییتی ماده‌لیک بیر حکم صادر قیلیش بیلن حکومت نینگ برچه سوزلاووچیلری، وزیرلری، والیلری و باشقه مسووللردن معین وقت‌ده خبرچیلرگه انیق معلومات بیریشنی طلب قیلگندی.
