بلاخره نن (سه شنبې) د مشرانو جرګې د وکیلانو له اختلافاتو نه وروسته، د ټاکنیزو کمېسیونونو د اصلاحاتو، واکونو، دندو او تشکیلاتو په اړه د ولسمشر تقنیني فرمان د رایو په اکثریت تایید شو.
د حکومت په وړاندې کړې طرحه کې د ټاکنو کمېسیون رییس د ۲ کالو او ۶ میاشتو له پاره او مرستیال او منشي یې د یو ـ یو کال له پاره ټاکل کېږي؛ خو د مشرانو جرګې له خوا دا وخت ۳ کالو له پاره تایید شو.
د دې ترڅنګ د ټاکنیزو شکایتونو له خپلواک کمېسیون نه د خپلوا کلمه، په ټاکنو کې د دوو بهرنیو ناظرانو حذفول، د رایو ورکوونکیو نوملړ حذفول هغه موارد دي، چې د مشرانو جرګې له خوا په دې قانون کې د تعدیلاتو په شکل راغلل.
په ورته وخت کې د مشرانو جرګې یو شمېر غړي وايي، چې د دغه فرمان تاید د ټاکنو د ترسراوي، له پاره زمینه برابرولی شي.
دغه وکیلان وايي، خلک غواړي، چې په قانون کې بدلونونه راشي، خو دوی د ټاکنو پر وخت په ټاکنو کې د سمون راوستلو باندې بې باور دي.
ډاکټر فیصل سمیع وویل، حکومت په مخکې ډېر کنفرانسونه لري او اړتیا ده، چې افغانانو او نړیوالې ټولنې ته د ټاکنیزو سمونونو د لاسته راوړنو په اړه معلومات ورکړل شي.
محمد رحیم حسنیار بیا پر ټاکنو هېڅ باور نه لري، وايي، هېڅ تضمین نه شته چې د دې فرمان له تایید وروسته دې د حکومت دواړه مشران د ټاکنو کمشنران همغږي کړي او په راتلونکیو شپږو میاشتو کې دې ټاکنې ترسره کړي.
اټکل کېږي، چې په راتلونکې اونۍ کې دغه فرمان د وروستۍ پرېکړې په اړه مختلط کمېسیون ته ولېږي.
