د افغانستان نوي ملي جبهې ګوند او د مشرانو جرګې ځېنو غړیو د پولنډ په پلازمېنه وارسا کې د ناټو هېوادونو او د افغان ولسمشر محمد اشرف غني او نورو چارواکیو له غونډې ملاتړ وکړ.
سناتورانو وویل، چې د دې غونډې پرېکړې له هر پلوه د افغانستان له پاره يوه لاسته راوړنه ده او دا د افغان امنیتي ځواکونو د مورال لوړولو په برخه کې هم اغېزمن تمامېدای شي.
مشرانو جرګې وویل، چې د افغانستان دښمنان اوس دې نتیجې ته ورسېدل، چې نور د دوی وړاندوینې نتیجه نه شي ورکولی.
دوی زیاته کړه، چې افغان حکومت هم باید د نړېوالو پر وړاندې پر خپلو کړو ژمنو عمل وکړي.
د جرګې غړي باقي بریال وویل، چې د ناټو غړو هېوادونو مرستې د افغانستان له پاره اړينې دي.
نوموړي زیاته کړه، چې افغان لوړ پوړي چارواکي باید د فساد پر وړاندې جدي مبارزه وکړي او ټولې کړې ژمنې باید عملي کړي.
په همدې حال کې یو شمیر سناتورانو د وارسا په غونډه کې د ولسمشر د وینا ملاتړ وکړل.
دوی وویل، چې په تېرو ۱۴ کلونو کې دا لومړی ځل و، چې په داسې يوه نړیواله غونډه کې د افغان ولسمشر له خوا پر پاکستان نیوکې کيږي، چې دغه هېواد د افغانستان په داخلي چارو کې لاس وهنې کوي او له تروریزم ملاتړ کوي.
ځينې نورو بیا ویل، چې نړېواله ټولنه باید د خپلو مرستو پرځای په افغانستان کې جګړه پای ته ورسوي.
له بل لوري د افغانستان نوي ملي جبهې هم په کابل کې د یوې خبري ناستې پر مهال وویل، چې د افغانستان په اړه د وارسا د ناستې له پريکړې ملاتړ کوي.
د یادې جبهې مشر انوار الحق احدي وویل، د ملي یووالي مشران باید پوه شي، چې د حکومت اعتبار په ټولنه کې ډېر کم شوی او د مشروعیت کړکيچ يې هم زیات شوی دی.
نوموړي زیاته کړه، چې د دغه کړکېچ له منځه وړلو په برخه کې جدي اقدام نه کول به سیاسي ټيکاو تر ستر ګواښ لاندې راوړي.
نوموړي د ناټو مرسته د افغانستان په ګټه و باله او زیاته يې کړه، چې له افغان ځواکونو د نړېوالو مالي ملاتړ به د افغانستان دولت او خلکو نه ښه دفاع وکړي.
سره له دې، چې د افغانستان نوې ملي جبهې د وارسا د غونډې پایلې د افغانستان په ګټه بولي، خو د ملي يووالي حکومت ته دا په ډاګه کړه، چې حکومت مشروعیت د خلکو له ملاتړه ترلاسه کوي نه د مرستندویو هېوادونو له ملاتړه.
