د مشرانو جرګې ځېنو استازو له حکومت څخه وغوښتل، چې په امنیتي بسټونو کې د سرپرستانو کار ته د پای ټکی کېږدي او ولسي جرګې ته دې نوي کسان د باور رایو د اخیستلو له پاره وروپېژندل شي.
د مشرانو جرګې لومړي مرستیال محمد عالم ایزد یار په نننۍ (سه شنبې) عمومي غونډه کې وویل، چې د سرپرستۍ قانون او په ځانګړي ډول د امنیتي ادارو په برخه کې هغه استثنا چې ولسمشر یې فرمان ورکړی و؛ تېره ورځ د ولسي جرګې جرګې له خوا رد شو.
دی وايي، حکومت دې ژر تر ژره د ملي دفاع وزارت او د ملي امنیت عمومي ریاست د سرپرستانو پر ځای نوي کسان جرګې ته ورمعرفي کړي.
د مشرانو جرګې وکیلانو د ملي دفاع وزارت په رهبرۍ نیوکې وکړې او وویل، چې دوی د جګړې د رهبري کولو وړتیا نه لري.
دوی وویل، په رهبریت کې ضعف د کندوز ولایت د سقوط او په دې وروستیو کې په هلمند ولایت کې د جګړې د دوام لامل شوي دي.
په همدې حال کې د مشرانو جرګې غړي محمداصف وکیلی وویل، چې د ناامنیو د زیاتیدو یولامل هم د ملي دفاع د وزیراو ملي امنیت د لوی رییس سرپرستي ده او ولسمشر دې ژر تر ژره ولسي جرګې ته نوماندان ور وپیژني که نه نو د بدو پایلو په اړه به یې مسولیت د ده پر غاړه وي.
د مشرانو جرګې وکیلان په داسې حال کې د امنیتي ادارو د سرپرستانو پر ځای د نوي کسانو د معرفي کولو غوښتنه کوي، چې له دې مخکې څو ځلې ملي شورا له حکومت څخه غوښتي و، چې نوي کسان دې ورمعرفي کړي.
خو له بل لوري ارګ د سرپرستانو د کار پای په امنیتي ادارو کې د کاري خلا رامنځته کېدلو په معنا یاد کړي وو.
