د پاکستان حکومت په کوټه ښار کې د طالبانو د کوټې شورا درې مهم غړي د چهار شنبې په ورځ هغه مهال ونیول، چې د طالبانو یو لوړپوړی پلاوی روسې ته په سفر لاړ.
یوې سرچینې د نوم نه خپرولو په شرط سلام وطندارته وویل، د دې پلاوي مشري د طالبانو اوسني مشر ملا هیبت الله کوي.
په نیول شول کسانو کې د طالبانو مالي مسوول ملاعبدالصمد ثاني، د دایکندي له پاره د طالبانو له خوا پخوانی ټاکل شوی ولسوال سلیمان اغا او د طالبانو د سترې محکمې رییس ملا عبدالله نانی چې د طالبانو د کوټې شورا مهم غړي دي، د پاکستان حکومت له خوا نیول شوي.
بیح الله مجاهد چې ځان د وسله والو طالبانو ویاند بولي، د غو کسانو نیول یې تایید کړي دي.
په پاکستان کې د سلام وطندار ازاد خبریال رازق برق وايي، د پاکستان حکومتي چارواکو د محرم میاشتې د روخصتي په پلمه په دې اړه خبرې نه کوي؛ ښايي، چې نن ورځ دغه موضوع معلومه شي.
د طالب مشر هبت الله په مشرۍ مسکو ته د دغه پلاوی د تګ انګېزه معلومه نه ده.
په ورته وخت کې ځینې شنونکي په دې بارو دي، چې ځینې هېوادونه او روسیه غواړي، له طالبانو په سیمه ییزو موضوع ګانو کې استفاده وکړي.
د سیاسي چارو شنونکی کابل خان تدبیر له سلام وطندار سره په مرکه کې وویل، روسیه په دې هڅه کې ده، چې د طالبانو په وسیله د داعش وسله والې ډلې د پرمختګ مخه ونیسي.
تدبیر وايي، روسیه نه یوازې له طالبانو سره په ټولو ولایتو کې اړیکې لري، بلکې طالبانو ته اکمالات کوي او دوی ته یې د نویو وسلو کارول هم ور زده کړې دي.
په دې اړه د ملي دفاع وزارت ویاند جنرال دولت وزیري وايي، چې د افغانستان په جګړه کې چچنیایان، ایغوریان، اوزبیک او پنجابیان شامل دي.
دی، چې د طالبانو له خوا د کلاشینکوف کارول په دې معنا نه دي، چې روسیه له طالبانو ملاتړ کوي.
د چارو بل شنونکی محمود حیدري بیا وايي، چې د طالب مشرانو سفر مسکو ته د کوټې شورا د غړو نیولو له امله دی. دی وايي، چې طالب پلاوی د خپلو غړو د ژغورنۍ له پاره روسیې ته تللي.
