د خوست ولایت یو شمېر امنیتې سرچینې خبر ورکوي، چې په دغه ولایت کې د اعتراض کوونکیو او لاریونوالو په منځ کې په شوې چاودنه کې د ۱۶ تنو د وژلو تر څنګ ۵۸ تنه ټپیان شوي دي.
د دغه ولایت امنیتي سرچینو د معلوماتو له مخې نن غرمه مهال په دغه ولایت کې د والي پر خلاف په چاودنه کې اعتراض کوونکیو او لاریونوالو ته درنه مرګ ژوبله واړوله.
د خوست یوې امنیتي سرچینې چې نه یې غوښتل نوم یې واخیستل شي سلام وطندار ته وویل، چې په دغه چاودنه کې د ولسي جرګې غړی همایون همایون هم ټپي دی.
تر اوسه کومې وسله والې ډلې د پېښې مسولیت په غاړه نه دی اخیستی.
له څو ورځو راهیسې په ولسي جرګه او ولايتي شورا کې د خوست يو شمېر وکيلانو او د دوى ځينو پلويانو د ولايتي ادارې او سرپرست والي پر خلاف اعتراضونه، غونډې او لاريونونه دوام لري.
د ولسي جرګې غړو کمال ناصر اصولي، همايون همايون او د هغوی ځينو پلويانو له څه مودې راپه دې خوا له مرکزي دولته په ځانګړي ډول له ولسمشره د سرپرست والي عبدالجبار نعيمي د ګوښه کولو غوښتنه کولې.
د ولسي جرګې غړي کمال ناصر اصولي د (مارچ په ۲۸مه) په یوه غونډه کې پر والي تور ولګاوه، چې په اداري فساد کې ښکېل دی او د خپلو شخصي ګټو په خاطر د پرمختيايي پروژو د پلې کېدو مخنيوی کوي.
پر لاریون دغه چاودنه په داسې وخت کې کېږي، چې د (مارچ په ۲۸مه) ناصر اصولي ګواښ کړی و، که ولسمشر غني په درېيو ورځو کې والي او پر فساد نور ککړ چارواکي له دندو لرې نه کړي؛ خوست ښار او د خوست – ګردېز لاره به وتړي او اعتراضونه به پراخ کړي.
خو ولایتې ادارې ویلي وو، چې د ولسي جرګې يو بل غړي همايون همايون هم پر والي سربېره د دغه ولايت ټول امنيتي ارګانونه هم په ژور اداري فساد ککړ بللي وو.
اعتراض کوونکو د خوست د والي د کور او دغه راز د اداري کمپلېکس تر څنګ چې ټولې دولتي ادارې په کې فعاليت کوي، د اعتراض په ډول يو شمېر خېمې هم وهلې دي.
