د ځیرک ښارګوټي په اړه ټولو ښکيلو لورو قانون نقض کړی

د ځیرک ښارګوټي دوسیې د ریښتیا موندنې پلاوی وايي، چې د دغه ښارګوټي په اړه ټولو ښکیلو لورو قانون نقض کړی.

له هغه وروسته، چې د ځیرک ښارګوټي ریښتیا موندې پلاوي ددې موضوع څیړنو دوسیه بشپړه کړه، دې دوسیې نور اړخونه پیدا کړل.

د اداری فساد پرضد مبارزې ادارې ځای ناستی رییس او د ځیرک ښارګوټي قضیې څیړنې پلاوي غړي سید غلام حسین فخري نن یکشنبه (فبروري۱۴مه) کابل کې خبري غونډې ته وویل، چې په دې قضیه کې لویې څارنوالۍ، د ښارجوړونې وزارت او د کابل بانک لانجې غوڅولو پلاوي د اساسي قانون خلاف عمل کړی دی.

د فخري په وینا دغو بنسټونو د ځیرک ښارګوټي تړون له خلیل الله فیروزي سره چې د کابل بانک ۱۳۳ میلیونه ډالر پوروړی دی، د قانون خلاف لاسلیک کړی دی.

په همدې حال کې د ځیرک ښارګوټي ریښتیا موندنې پلاوي بل غړي محمد یاسین عثماني خبري غونډې ته وویل د ولسمشر پخواني حقوقي سلاکار عبدالعلي محمدي د قانون خلاف حکومتي بنسټونو ته له خلیل الله فیروزي سره د تړون لاسلیک کولو لارښوونه کړې ده.