بغلان ولایتی یشاوچیلریدن بیرقطاری، دولت‌گه قرشی قورال‌لی عصیانچی‌لر تامانیدن نیچه مسجد یاندیریلگنی‌گه قرشی ناراضی‌لیک بیلدیریب یول‌لرده چیقگن‌لر. ناراضچی‌لرنینگ آگاه‌لنتیریشیچه، مسجدلرنی یاندیرگن کیشی‌لر حکومت تامانیدن توتقونگه آلینمه‌گونچه، اولر ناراضی‌لیک‌لریگه دوام بیره‌دی.
اوشبو ناراضی‌لیک اشتراک‌چیلریدن ایکی ته‌سی سیدنبی حسین‌خیل و فرزادنینگ ایتیش‌لریچه، بوندن آلدین طالب‌لر مسجدلرگه پارتلش هجوم اویوشتیرر ایدی، بیراق حاضر دولت اولرنینگ باشقریش‌گه کوچسیز بولگنی باعث، مسجدلرنی اوتکه یاندیره‌دی؛ نیمه اوچون دولت بونده‌ی حرکت‌لر برابریده جیم توره‌دی؟
بغلان پولیس قومندانلیگی سرپرستی عبدالرشید بشیرنینگ ایتیشیچه، اوتکن تورت کون جریانیده پل‌خمری شهری دندغوری منطقه‌سیده 6 مسجد قورال‌لی طالب‌لر تامانیدن یاندیریلگن. جناب بشیرگه کوره، قورال‌لی عصیانچی‌لر دندغوری منطقه‌سیده حاکم دیر، مسجدلردن حربی اورین صفتیده ایش آله‌دیلر.
بغلان پولیس قومندانلیگی سرپرستی، مسجدلر اوتکه یانگن سببینی، عشر و ذکات سهمیه‌سی اوستی‌گه، مذکور گروه اورته‌سیده توقنه‌شوو یوزبیرگنی دیب بیله‌دی. اونینگ ایتیشیچه، طالب‌لر دندغوری منطقه‌سیده خلقدن باج آله‌دی و شونینگ‌دیک، خلقدن عشر و ذکات توپله‌یدیلر.
باشقه تاماندن، بغلان عالم‌لر کینگشی عضوی مولوی حسیب‌الله حنیفی، مسجدلر اوتکه یاندیریلیشینی اسلام دینی‌گه حرمت سیزلیک و کافرلر ایشی دیب بیله‌دی.
بغلان ولایتی امنیتی مسؤول‌لر و خلق، مذکور ولایت‌ده مسجدلر یاندیریلیشینی طالب‌لرگه نسبت بیره‌دی، بیراق قورال‌لی طالب‌لر حاضرگچه بوتوغریده هیچ نرسه دیمه‌گن.
