دولت و طالبان نینگ مذاکره قیلووچی هیأت‌لری، افغانستان‌لیکلرارا سوزلشوولر باشله‌نیشی اوچون جنجللی موضوعلرنی حل قیلیش نیتیده ایکی تامان تماس گروه‌لری نینگ اوچره‌شگنیدن خبر بیریشگن.
بوگون (دوشنبه ۷- میزان) افغانستان دولتی نینگ مذاکره قیلووچی هیأت اعضاسی نادر نادری نینگ ایتیشیچه، ایکی تامان نینگ تماس گروه‌لری نیچه کوندن کیین، اوتگن کون (یک‌شنبه ۶- میزان) شام چاغی قوشمه ییغین یولگه قویگنلر.
جناب نادری توییتر صحیفه‌سیده یازیشیچه، مذکور ییغین نیچه ساعت دوام تاپگن و ایکی تامان جنجللی موضوعلر خصوصیده بحث قیلگن. شونینگدیک بو بحث‌لرنینگ دوام تاپیشی ممکن.
عین حالده، طالبان سیاسی دفتری سوزلاوچیسی نعیم بیر توییت یازیب ایتیشیچه، جنجللی موضوعلرنی حل قیلیش اوچون ایکی تامان تماس گروه‌لری آرقه‌لی سعی و حرکت‌لرنینگ دوامی بار.
اونینگ ایتیشیچه، مذکور موضوعلر حل بولگندن کیین افغانستان‌لیکلرارا سوزلشوولر باشله‌نیشی ممکن.
قطرده افغانستان‌لیکلرارا تینچلیک سوزلشوولری ۲۲- سنبله ده باشلندی، بیراق افغانستان دولتی و طالبان گروهی نینگ هیأت‌لری حاضرگچه جنجللی موضوعلرنی حل قیله آلمه‌گن.
افغانستان‌لیکلرارا تینچلیک سوزلشوولری نینگ بیرینچی ییغینده ایکی تامان نینگ تماس گروه‌لری نیچه ییغین یولگه قویدی، بیراق مذکور ییغینلر حاضرگچه نتیجه بیرمه‌گن.
