اوتگن کون (یکشنبه ۲۳- سنبله) شام چاغی افغانستان دولتی و طالبان نینگ تماس گروهیلری نی بیرینچی ییغینی یولگه قوییلگن.
افغانستان دولتی نینگ مذاکرهچی هیأتی بیر توییت آرقهلی یازیشیچه، مذکور ییغینده ایکی تامان رفتاری اصول، بیرینچی سوزلشوو نینگ تقسیم اوقاتی و باشقه موضوعلر خصوصیده بحث قیلگنلر. ایتیلیشیچه، مذکور ییغین بوگون هم دوام تاپهدی.
اوشبو ییغینده طالبان و افغانستان دولتی نینگ تماس گروهی افغانستانلیکلرارا سوزلشوولرگه بحث اوتکزیلهدیگن موضوعلر حقیده سوزلشیشی ممکن.
ایکی تامان نینگ تماس گروهی شنبه کونی افغانستانلیکلرارا سوزلشوولر نینگ باشلهنیش مراسمی اوتگنیدن کیین، ایجاد ایتیلگن. دولت نینگ تماس هیأتی نی ۷ و طالبان نینگ تماس گروهی نی ۵ اعضاسی بار.
محمدمعصوم استانکزی، احمد نادر نادری، عنایتالله بلیغ، محمد ناطقی، ضراراحمد مقبل، فوزیه کوفی و خالد نور افغانستان اسلامی جمهوریتی نینگ تماس گروهی اعضالری دیر و مولوی عبدالکبیر، شیرمحمدعباس استانکزی، نورالله نوری، شیخ دلاور و شیخ قاسم طالبان نینگ تماس گروهی اعضالری دیر.
ایتیش کیرهک کیم، دولت نینگ هیأتی و طالبان گروهی آرهسیده رسمی سوزلشوولر بوگون (دوشنبه ۲۴- سنبله) یولگه قوییلیشی گه قرار قیلینگن ایدی، بیراق تماس گروهلری نینگ جلسهلری دوام تاپگنی باعث آرتده قالگن.
اوتگن کون ملی مصالحه عالی کینگش باشلیغی عبدالله عبدالله دوحه ده خبری بیر ییغین آرقهلی ایتیشیچه، افغانستانلیکلرارا سوزلشوولر باشلهنیشی بیلن زوروانلیکلر میزانی کمهیشی نی کوتیب تورگن.
