بوگون کابل‌ده خبری بیر ییغین‌ده جینوا ییغینی‌گه اشتراک ایتیش اوچون تنلنگن مدنی فعاللردن بیر قطاری‌نینگ ایتیشیچه، افغانستان حکومتی 2016- ییل بروکسل ییغینی‌ده سوزبیرگن وعده لرینی عمل‌گه آشیرمه‌گن بیرحالده، مذکور ییغین‌ده اشتراک قیله‌دی.
اولرگه کوره، ملی بیرلیک حکومت قانون نی عملی ایتیش، اداری فسادگه قرشی کوره‌ش، قشاقلیک نی کمه‌یتریش، سیلاولر تنیقلیگی و خوفسیزلیک نی تأمین ایتیشی‌گه ناکام بولگن.
جینوا ییغینی‌ده اشتراک قیله‌دیگن افغانستان مدنی جماعه‌سینی اعضاسی نعیم ایوبزاده‌نینگ ایتیشیچه، مدنی جماعه‌نی تیکشیروی اساسی‌ده، حکومت دنیا جماعه‌چیلیگی‌گه بیرگن سوزلرینی عمل گه آشیرالمه‌گن.
اونگه کوره، قشاقلیک، ایش‌سیزلیک و ناتینچیلیک کوپه‌یگن و یشاوچی‌لرگه معیاری خدمت‌لر ترقه‌تیلمه‌گن.
ایوبزاده‌نینگ کوپه‌یتیریشیچه، سیلاوگه اصلاحات کیلتیریش توغریسیده هیچ قندی ایش بولمه‌گن وافغانی پول بهاسی قویی کیلگن.
جینوا ییغینی‌ده افغانستان مدنی جماعه‌سینی موقف نی کورسته‌دیگن قطع‌نامه‌نینگ کورستیشیچه، افغانستان 34 ولایتی‌نینگ مدنی جماعه‌سی، مملکت‌ده اوروش یکونلنیشی نی سوره‌گنلر.
اوشبو قطع‌نامه‌نینگ باشقه بیر بولیمی‌ده کیلیشیچه، افغانستان مدنی جماعه‌سی افغانستان حکومتی و دنیا جماعه چیلیگی‌دن افغانستان بوییچه اصلاحات کیلتیریش، سیلاو تنیقلیگی، اداری فسادگه قرشی کوره‌ش نی سوره‌گنلر.
بیراق سلام‌وطندارگه صحبت بیرگن جمهورلیک ریاستی سوزلاوچیسی‌نینگ اورین باسری شاه‌حسین مرتضوی‌نینگ ایتیشیچه، افغانستان حکومتی برچه بولیم‌لرده اینیقسه قانون‌گه اصلاحات کیلتیریش و اداری فسادگه قرشی کوره‌ش خصوصیده کوپینچه یوتوق‌لرگه ایگه بولگن.
جینوا ییغینی‌ده مدنی جماعه نماینده‌لری‌نینگ ایتیشیچه، اولر یشاوچی‌لرنینگ فکرینی اورگه‌نیش اوچون 34 ولایت‌ده 1170 مدنی نهاد بیلن صحبت اوتکزگن‌لر.
جینوا ییغینی جاری میلادی آی‌نینگ 27 و 28- سیده سویس مملکتی‌ده یولگه قوییله‌دی.
