ننگرهار ولایتی مدنی فعال‌لری نینگ بیرقطاری کابل‌ده خبری انجمن آلیب ننگرهار کوت تومنیده‌گی سونگی ناتینچ‌لیکلرنی قاره‌لب ایتیشلریچه، حکومت نینگ داعشنی نابود قیلیشگه اراده‌سی قالمه‌گن. اولرگه کوره، ننگرهار ولایتی داعش توشینچه‌لرینی ترقه‌تیش مرکزی بولگن و کوپلب دینی مدرسه‌لر و دولتی اداره‌لر داعش کیلیشی‌نی کوته‌دی و مذکور گروه نفع‌گه عمل قیله‌دیلر.
مدنی فعال ننگرهار کوت تومنی یشاوچی‌لریدن بیری عبدالله پیکارنینگ مذکور اولتیریشده بیرگن بیاناتیگه کوره، جلال‌آباد شهری داعش گروهی‌گه نفر جذب قیلیش اوچون قیسی بیر توسیق‌گه روپه‌ره ایمس. پیکارنینگ معلوم قیلیشیچه، کوت تومنیده داعش گروهی فعالیتی شدت تاپیشی بیلن مذکور تومن یشاوچی‌لریدن بیر قطاری یشش بنالرینی ترک قیلیب منطقه‌دن چیقگن و قالگنلری ایسه داعشنی قبول قیلیب شو گروه‌گه یاردم بیریشه‌دی.
بو مدنی فعال‌لرگه کوره، حکومت مشریقی ولایتلرده داعش فعالیتی‌گه قرشی عمل قیلیشنی ایسته‌میدی.
اولرگه کوره، حکومت داعش‌گه قرشی عمل قیلگن صورتده ایدی، بوگروه نینگ رادیوسی فعالیتی آلدی آلینردی.
اوتگن ییل دسمبر آییده، ننگرهار محلی رسمی‌لری و افغانستان مخابرات وزیرلیگی مذکور ولایتده رادیویی اوسکونه‌سی بارلیگی‌نی تأیید قیلگن ایدی. بیراق شو ییل باشله‌نیشی بیلن عملیات اوتکزیب مذکور رادیو اوسکونه‌سی نابود قیلیندی. شو بیلن بیرگه نیچه آیدن کیین مذکور رادیو قیته فعالیتی‌گه قوشیمچه اوزبیکچه پروگرام‌لرنی هم باشله‌دی.
انتقادلر بولیشی بیلن بیرگه محلی رسمی‌لر منطقه‌ده توقنه‌شوولر اوتکزیلیب کیلیشی‌دن معلومات بیره‌دی. ننگرهار والیسی سلیم‌خان قندوزی نینگ جلال‌آباد شهریده خبری انجمن آلیب ایتیشیچه، مذکور توقنه‌شووده امنیتی کوچلر حالتی تعرضی بولگن. اونینگ کوپه‌یتیریشیچه، سونگی توقنه‌شوولر 400 عیاله‌نی یشش بنالریدن بدرغه بولیشگه سبب بولگن.
جناب قندوزی نینگ معلوم قیلیشیچه، توقنه‌شوو باشله نیشیدن حاضرگه قدر داعش گروهیدن هلاک بولگنلر سانی 165 کیشی بولگن.
عین حالده ننگرهار ملی امنیت ریاست باشلیغی دادمحمد حریفی بولیب اوتگن توقنه‌شووده داعش گروهی کوپلب عیاللرنی اوزلری بیلن بیرگه آلیب کیتگن‌لیگینی یلغان بیله‌دی و اونی تبلیغاتی اوروش دیب بیله‌دی.
اوتگن جمعه کیچه‌سی (4 سرطان) داعش گروهی ننگرهار کوت تومنیده یوروش قیلیشی بیلن امنیتی کوچلردن 12 ته‌سینی اولدیرگن ایدی.
