افغانستان عیاللریدن بیرقطارینینگ ایتیشیچه، عیاللرگه قرشی زورهوانلیکنی یوقاتیش خلق ارا کونیدن نشانلش، عیاللر قیینچیلیگینی حل ایتمهیدی و حکومت عمل اورنیده شعار بیرهدی.
(25- نوامبر) عیاللرگه قرشی زورهوانلیکنی باشقریش خلق ارا کونی دیر. افغانستان دولتی بو کوندن «تینچلیک اویدن جهانگچه» عنوانی بیلن نشانلهدی.
افغانستان جمهور رییسی محمداشرف غنی و اجراییه باشلیغی عبدالله عبدالله، پیام آرقهلی اوشبو کون مناسبتی توغریسیده ایتیشیچه، حکومت عیاللرگه قرشی زورهوانلیک برابریده کورهشیش خصوصیده، شغلله نووچی دیر.
بیراق، اوشبو مراسمده تشریف بویورگن عیاللردن بیرقطارینینگ ایتیشیچه، افغانستان حکومتی عیاللرگه قرشی زورهوانلیک برابریده کورهشیشگه سعی و حرکت قیلمهیدی و بوندهی ییغینلر پیت اوتکزیب و پول خرچ قیلیشدن باشقه هیچ بیر منفعتی یوق دیر.
کابل سواد اورگهتیش ادارهسی باشلیغی هما نورستانینینگ ایتیشیچه، حکومت رسمیلری بوکونده یالغیز پیام بیرهدی و بو پیاملر هیچ دردنی دارولمهیدی؛ اولر عیاللرگه قرشی زورهوانلیکنی یوقاتیش خصوصیده ریحه توزهتیشی کیرهک.
کابل ولایتی کینگش نمایندهسی زهرا نوابینینگ ایتیشیچه، «بوگون اساسی موضوعلر ایتیلمهی و ایسدن چیقاریلگن. یالغیز بو ییرده کیم سوزگه چیقسین و کیمنی پیامی اوقیلسین، تمام؛ بیراق بوگون اونملی مسئلهلر اوستیگه سوز یوریتیلیب و باشقه افغانستان عیاللریگه قرشی زورهوانلیک بولمهسی توغریسیده سوزبیریش کونی ایدی».
عیاللر وزیری دلبر نظرینینگ ایتیشیچه، جاری ییل باشلهنیشیدن بویان عیاللرگه قرشی زورهوانلیکدن اوچ الی تورت مینگ قضیه اوشبو وزیرلیکده رویخطگه آلینگن و بو رقم اساسیده، عیاللرگه قرشی زورهوانلیک اوتگن ییلگه قرهگنده ییترلی صورتده کوپهیگن.
بیرلشگن ملتلر تشکیلات جمعیت صندوقی تیکشیروولری نتیجهسیگه کوره، افغانستان عیاللریدن 87 فایزی زورهوانلیکلردن بیرقسمینی تجربه قیلگن و اولردن 62 فایزی ایری زورهوانلیکلرگه روپهره بولگن.
شونینگدیک خانم نظرینینگ ایتیشیچه، عیاللر وزیرلیگی، عیاللرگه قرشی زورهوانلیکنی باشقریش خصوصیده 16 کونلیک کمپیننی یولگه قویگن؛ دولتی، مدنی ادارهلر، میدیالر، اماملر، عالملر، سیاسی حزبلر، انسان حقوقی فعاللری، فعال عیاللر و یشاوچیلردن اوشبو کمپینگه اشتراک ایتیشی سورهلگن.
انه شوندهی، مملکت بیرینچی خانمی رولا غنی، عیاللرگه قرشی زورهوانلیک میزانی آشگنی توغریسیده اشاره قیلیب ایتیشیچه، اوشبو موضوعنی یوقاتیش خصوصیده، اویغونلیکده ایشلش کیرهک.
شونینگدیک، افغانستان بوییچه بیرلشگن ملتلر تشکیلاتی نمایندهلیک دفتری بیر خبرنامه ترقهتیب ایتیشیچه، افغانستانده عیاللرگه قرشی زورهوانلیک برابریده کورهشیشدن حمایه ایتهدی. مذکور تشکیلات خبرنامهسیده بیرلشگن ملتلر تشکیلات دفتری عیاللر بولیمی مسؤولی الزیرا سگیانبایوفدن نقل بولیب کیلیشیچه، افغانستانده قیزلر و عیاللرگه قرشی زورهوانلیک کینگ شکلده یوکسلگن.
هرات عیاللری برابریده 347 زورهوانلیک اویوشتیریلگن
 - Copy 1.JPG)
شونینگدیک، هرات محلی رسمیلری، عیاللرگه قرشی زورهوانلیک برابریده کورهشیش خلق ارا کونیدن نشانلش مراسمیده ایتیشیچه، جاری ییل باشلهنیشیدن جاری ییل عقرب آییگچه، مذکور ولایت عیاللریگه قرشی 347 زورهوانلیک رویخطگه آلینگن.
هرات زورهوانلیکنی باشقریش یوکسک کمیسیون عضوی احمدرفیع نادرینینگ ایتیشیچه، 170 زورهوانلیک قضیه باش قارهلاوچیلیک، 111 قضیه انسان حقوقی کمیسیونینینگ دفتری، 68 قضیه عیاللر ایشلری بوییچه ریاستی، 39 قضیه امنیه قومندانلیگی و باشقه 22 قضیه هرات زورهوانلیکنی باشقریش کمیسیونیده رویخطگه آلینگن و بو جملهدن 63 قضیه تکرار شکلده ایکی ادارهده ثبت ایتیلگن.
شونینگدیک، جناب نادرینینگ ایتیشیچه، هرات باش قارهلاوچیلیگیده رویخطگه آلینگن 170 قضیه قانون اساسیده، تیکشیریلگن و باشقه قضیهلر عیاللرگه قرشی زورهوانلیکنی باشقریش قانونی 39- مادهسی و ایکینچی بندی اساسیده، آرشیف بولگن. اونگه کوره، اوشبو زورهوانلیکلردن کوپینچهسی قتل، جنسی زورهوانلیک، اوزینی اولدیریش، زهرلنیش، کلتکلش، روانی زورهوانلیکلر، یاشی تولمسدن تورموش قوریش، اوییدن قاچیش و خرجتینی تولمسلیکدن عبارت بولگن.
هرات ولایتی زورهوانلیکنی باشقریش قارهلاوچی ماری مهنیارنینگ ایتیشیچه، باش قارهلاوچیلیککه تاپشیریلگن دوسیهلر جدی صورتده تیکشیریلهدی و عامللری دار و اوزاق مدتلی حبسگه محکوم بولهدی.
فاریاب عیاللری برابریده 91 زورهوانلیک اویوشتیریلگن
فاریاب ولایتی انسان حقوقی ایرکین کمیسیون دفتری «عیاللرو قیزلرگه قرشی زوانلیکنی یکونلنتیریش» عنوانیده عیاللرگه قرشی زورهوانلیکنی باشقریش خلق ارا کونیدن نشانلهدی.
اوشبو دفتر مسؤولی سید حفیظالله فطرتنینگ ایتیشیچه، جاری ییل فاریاب عیاللریگه قرشی 91 زورهوانلیک قضیه رویخطگه آلگن. فطرت ایشانچیگه کوره، ناتینچلیک، جنسی تبعیض، ناتوغری اجتماعی رسمورواجلر عیاللرگه قرشی زورهوانلیک عامللریدن دیر.
بیراق، اوشبو مراسم اشتراکچیلری قانون عملگه آشیریلمسلیگی و خلق آگاهسیزلیگینی عیاللرگه قرشی زورهوانلیک عاملی دیب بیلهدی.
