د افغانستان د مدني ټولنو د مجتمع موسسې (مجما) غړو نن (دوشنبه جولای ۴مه) په کابل کې د یوې خبري غونډې پر مهال وویل، د طالبانو د وروستي برید په اړه، چې سلګونه نظامي او ولسي خلکو ته په کې مرګ ژوبله واوښته د عالمانو شورا سکوت یې یو شرمناک کار وباله.
وسله والو طالبانو تېره اوونۍ د میدان وردګو له روزنیز کمپ نه د تازه فاروغو شویو ځوانو پولیسو افسرانو په کاروان د کابل په کمپنۍ سیمه کې ډله ییز ځانمرګي بریدونه وکړل، چې په پایله کې یې ۱۵۰ تنه پولیسو افسران ووژل او ټپیان کړل.
د مجما یو تن غړي خلیل روفي وویل، چې د دولت وسله والو مخالفینو له لوري د هېوادوالو او د امنیتي ځواکونو د وژل کېدو په اړه د حکومت مشرانو بې پروايي او د دغو وژنو د دوسیو نه پلټل د زغملو نه دي.
روفي وايي، سره له دې چې هېوادوالو او مدني فعالانو تل په نظام کې د پنځم ستون له موجودیته شکایت کړی، خو حکومت دې موضوع ته جدي پام نه دی کړی.
د مجما مسوولینو د دغه برید غندلو ترڅنګ وویل، چې د یو پرېکړه لیک په لوستلو سره د حکومت مشرانو قومي او تعصبي چلند وغندلو او لوړ پوړو چارواکو يې وغوښتل، چې د پولیسو په تازه فارغو شویو افسرانو د تېرې اوونۍ له عاملینو سره دې سلیقوي چلند ونه کړي.
د عالمانو شورا په هېواد کې د سترې دیني بنسټ په توګه د وسله والو طالبانو د بریدونو په اړه سکوت کړی دی او په کمه کچه یې په نظامیانو او ولسي خلکو د طالبانو بریدونه غندلي دي.
ولسمشر غني په کابل کې د نویو فارغو شویو افسرانو په کاروان د برید په اړه د کورنیو چارو وزارت د ۵ لومړۍ درجه مسوولینو دندې وځنډولې.
