ارگ و اسلامی جمعیت حزبی کیلیشگنیدن سونگ، محمداسحق رهگذر بلخ ولایتینینگ ینگی حاکمی صفتیده رسمی شکلده تانیشتیریلدی. بلخ ولایتینینگ ینگی حاکمی تانیشتیریلش مراسمی ده جمهور رییس دفتری باشلیغی عبدالسلام رحیمی، اسلامی جمعیت حزبی اورین باسری و بلخ ولایتینینگ رسمیلری و قوم بویوکلری اشتراک قیلگنلر.
ینگی حاکم تانیشتیریلیش مراسمی ده بلخ سابق حاکمی عطامحمد نورنینگ ایتیشیچه، ارگ بیلن جمعیت سوزلشوولریدن سونگ، خلق منفعتینی نظرگه آلیب، محمداسحق رهگذر حاکم صفتیده و جنرال اکرم سامع پولیس قومندانی صفتیده تانیشتیریلیشی خصوصیده قرار قیلگنلر.
جناب نورنینگ ایتیشیچه، اوچ آی چوزیلگن سوزلشوولر و جنجللر شخصی منفعت اوچون بولمهگن؛ بلکیم برچهسی خلق منفعتی اوچون دوام قیلگن.
عین حالده، اوشبو ییغینده نطق سوزلهگن جمهورلیک ریاستی دفترینینگ باشلیغی عبدالسلام رحیمی، وجودگه کیلگن کیلیشوونی کته یوتوق بیلیب و افغانستان خلقینینگ بیرلیگی و بیردملیگی اوستیگه تأکیدلهدی.
عطامحمد نور کمیده اوچ آی آلدین، جمهورلیک ریاستی تامانیدن استعفاءسی اعلان قیلینگنی و انجنیر داوود بلخ ولایتینینگ ینگی حاکمی صفتیده تانیشتیریلگنیدن سونگ، ارگ مقابلیده قرشیلیک بیلدیریب و بو فرماننی تَن آلمهدی. قرهمه قرشیلیکلر کوپهییب و ارگ برابریده اونینگ آگاهلنتیریشلریدن سونگ، وجودگه کیلگن قیینچیلیکلر حل ایتیلیشی اوچون ارگ و جمعیت حزبی تامانیدن ایکی تیم بلخ گه یوباریلدی و نهایت ده ایکی تامان قرهمه قرشیلیکلر اوستیگه کیلیشیب و کیلیشوو یوز بیردی.
شونینگدیک، نجیب فهیم طبیعی حادثهلرگه قرشی کورهش دولت وزیری صفتیده، میرویس بلخی معارف وزیری صفتیده و فرهاد عظیمی قزاقستان ایلچیسی صفتیده جمعیت حزبی تامانیدن جمهورلیک ریاستی گه تانیشتیریلگنلر.
انتقالی حکومت دورانیده محمداسحق رهگذر بلخ ولایتینینگ حاکمی بولگن و بوندن سونگ، باشقه دورلرده مذکور ولایت اهالیسینینگ نمایندهسی صفتیده نمایندهلر کینگشی گه کیرگن. او، اسلامی جمعیت حزبینینگ ییریک اعضالریدن بیری دیر.
