د افغانستان د «بدن ښکلا» د ۱۳م پړاو ۳ ورځنۍ ملي سیالۍ چې د بدن ښکلا او فټنس فدراسیون له لوري پیل شوې وې، نن (پنجشنبه) پایته ورسېدې.
د افغانستان د بدني روزنې ریاست د مالوماتو له مخې، مجیبالرحمان رحماني په یادو سیالیو کې د «مېسټرافغانستان» لقب ګټلی دی.
دغه راز د کابل لوبغاړي محمدرومل افضلي په کم وزن او د نیمروز ولایت لوبغاړي ملتان د لویانو په برخه کې دویم او درېیم مقامونه ګټلي دي.
په دې سیالیو کې د ۲۶ ولایتونو شاوخوا ۵ سوه لوبغاړو ته په ۱۰ بېلابېلو کلاسونو کې د چمتووالي او بدن ښکلا نندارې وړاندې کولو چانس ورکړل شوی و.
د یادو سیالیو په پای کې کابل لومړی، هرات دویم او نیمروز ولایت درېیم مقامونه ګټلي دي.
د افغانستان د «بدن ښکلا» او فټنس فدراسیون تخنیکي مرستیال نورالهدا وايي، په سږنیو سیالیو کې د «مېسټرافغانستان» لقب ګټلو لهپاره د هېواد په کچه ګڼ شمېر ځوانو لوبغاړو ګډون کړی و.
د یادونې ده چې محمدیاسین سالک قادري تېرکال د «مېسټرافغانستان» لقب ګټلی و چې بیا یې په اسیايي او نړېواله کچه هم د «مېسټراسیا» او «مېسټریونیورس» لقبونه وګټل.
