جمهور رییس نامزد وزیرلرنی کیچیکتیریب، مجلس اعضالری بیلن سیاسی اوین قیلماقده.
نمایندهلرنینگ عمومی اولتیریشده حکومت اینیقسه جمهور رییس غنیدن انتقاد قیلیب ایتیشلریچه، اوشندهیکه مجلسگه نامزد وزیرلر معرفی قیلیش وقتی یکونله گن، اما هنوزگچه جمهور رییس بوبارهده بیر ایش قیلمهگن و نمایندهلر بیلن سیاسی اوییننی باشلهگن.
مجلس نینگ بیرینچی اورین باسری همایون همایون نینگ ایتیشیچه، امنیتی نهادلر وزیرلری نینگ استیضاح قیلگندن سونگ ایشدن آلینگن وزیرلر اورنیده نیچه نامزد وزیرنی تیزلیکده مجلسدن ایشانچ آواز آلیش اوچون معرفی قیلیش وعدهسینی بیرگن ایدی، اما حاضرگه قدر بو ایشنی قیلمهگن.
جناب همایون نینگ ایتیشیچه، ینه بیربار نمایندهلر جمهور رییسدن تیزلیکده نامزد وزیرلرنی معرفی قیلیشینی طلب قیلگنلر، بولمهگنده، نمایندهلر کینگشی ملی بیرلیک حکومت چارچوبهسیده پارلمان حقوقی و اصلی اورنینی قولدن بیرهدی و حکومت دموکراتیک ایمس، بل دیکتاتور حکومت دیب تانیلیشی ممکن.
بیراق جمهور رییس سوزلاوچیسی نینگ اورین باسری دواخان مینهپال نینگ سلاموطندارگه ایتیشیچه، حاضرهم نامزد وزیرلرنی معرفی قیلیش بارهسیده تارتیشوولر دوامی بار و حکومت مجلسگه نامزد وزیرلر لیستینی یوبارهدی.
اوشندهیکه جناب مینهپال کیشینی نامزد وزیردیب آت توتمیدی، اما ایتیشیچه ینگی نامزد وزیرلر برچهسی بیلیملی و مختصصلر.
اوتگن ییل عقرب آییده مجلس کوتیلمهگن بیر حالده، سالیق/مالیه، تشقی ایشلر، شهر قوریش، تحصیلات، ایش و اجتماع، عامه فواید، عدلیه، ترانسپورت، معارف، سوو و برق، ایکینچیلیک، مخابرات، اقتصاد، ساغلیقنی سقلش، قاچیقینلر و مخدره مادهگه قرشی کورهش وزیرلیکلری ییللیک بودجهلریدن 70 فایزینی مصرف قیلالمهگنلیگیگه عیبلهنیب استیضاح بولگن ایدیلر و بو جملهدن 7 وزیر ایشانچ آوازینی قیته قولگه کیلتیرالمهدی و قالگن 9 وزیرلیک سرپرستلری مجلسدن ایشانچ آوازینی قولگه کیلتیریب ینه ایشلریگه باشلهدیلر.
