بوگون «چهارشنبه» نماینده‌لر کینگشی‌نینگ عمومی ییغینیده، کینگش اعضالریدن بیرقطاری، برشنا شرکتی‌نی ناقانونی پول آلیش‌گه عیب‌لب ایتیشیچه، مذکور شرکت زوره‌وانلر برق صرفله‌یدیگن پول‌نی ییغه آلمه‌ی و بو پول‌نی اهالی‌دن آله‌دی.
هرات اهالیسی‌نینگ نماینده‌سی ناهید فریدنینگ ایتیشیچه، برشنا شرکتی اهالی‌دن ناقانونی شکلده پول ییغه‌دی.
اونینگ ایتیشیچه، قطار کیشی‌لر، عصری «دیجیتال» و ایسکی «انالوگ» میترلرنی منزل‌لریده نصب قیلگن‌لر، ایسکی میترلرگه نبستن دیجیتال میترلر 61 فایز میزان آشگنینی کورسته‌دی و بو مسئله اهالی‌نی الده‌ش و ناقانونی پول آلیش دیر.
او، نماینده‌لر کینگشی‌دن، مخابرات و مواصلات کمیسیونی‌گه برشنا شرکتی‌نی لغو قیلیب و اونینگ وظیفه‌سینی سوو و برق وزیرلیگی‌گه تاپشیریش اوچون بویروغ بیریشینی سوره‌گن.
نماینده‌لر کینگشی اعضالریدن باشقه بیری رمضان بشردوست‌نینگ ایتیشیچه، سونگی نیچه آیده برشنا شرکتی دالر بهاسی یوقاری کیتگنینی بهانه قیلیب و برق پولی‌نی کوپه‌یتیرگن، بیراق بو شرکت افغانستان‌گه برق ساته‌دیگن مملکت‌لرگه نیچه ییل پولی‌نی بیردیک توللَیدی.
لیکن، برشنا شرکتی سوزلاوچیسی وحیدالله توحیدی، نماینده‌لر کینگشی اعضالری‌نینگ ادعالرینی رد قیلیب ایتیشیچه، ایسکی میترلر معیارگه برابر ایمس دیر.
جناب توحیدی‌گه کوره، برشنا شرکتی هر ییل برق ساته‌دیگن مملکت‌لر بیلن ینگی شرطنامه باغله‌یدی و ییل آخریده پولی‌نی توللَیدی.
شونینگ‌دیک، بوندن آلدین، باشقه نیچه ولایت‌نینگ یشاوچی‌لری، برق پولی آشگنی‌دن شکایت قیلگن ایدیلر، بیراق اولرنینگ ایتیشیچه، حاضرگه‌قدر بو قیین‌چیلیک حل ایتیلیشی خصوصیده، حکومت و برشنا شرکتی تامانیدن هیچ بیر ایش قیلینمه‌گن.
