مملکت مالیه وزیری اکلیل حکیمی افغانستان حکومتی ایچکی درآمدی اوتگن اون آیده 99 میلیارد افغانیگه ییتگن دیگن. بوگون (دوشنبه) پارلمانگه چقیریلگن مالیه وزیری هنوز هم مملکت بودجه کسریگه دوچار دیگن.
بودجه کسری دولت کوپراق دخلدن خرچ قیلگنلیگی سبب اورتهگه چیققنده ایتیلماقده. افغانستان ملی بیرلیک حکومتی ایشگه باشلهمسدن آلدین نیچه میلیون بودجه کسریگه روپه ره ایدی.
مالیه وزیرینینگ ایتیشیچه، کیلگوسی ایکی آیده حکومتنینگ مجموعی درآمدی 100 میلیاردگه ییتیشیشی کوتیلهدی و شونینگدیک کیلگوسی ایکی هفتهده افغانستان ییللیک بودجهسینینگ طرحی مجلسگه تقدیم ایتیلهدی.
او نینگ سوزلریگه کوره، افغانستان هلی خلق ارا دنیا پول صندوغی تامانیدن تعین ایتیلگن هدفگه ییتگن و بو هدفگه ایریشیش بیلن پول خلق ارا صندوغی افغانستانگه 57میلیون دالر تولهشی کیرهک.
شونینگدیک مالیه وزیری بعضی مملکتلرهم افغانستان بودجهسیگه همکارلیک قیلیشدن سوز بیرگن دیگنلر.
عین حالده، جناب حکیمی کیلگوسی آیلرده ناتو همده باشقه مملکتلر اشتراکیده اوتکزیلهدیگن ییغینده افغانستان ملی کوچلری اوچ ییللیک حمایت ایتیلیشی اوستیده بحث ایتیلیشی کوتیلهدی دیگن.
شوکبی جناب حکیمی هنوزگچه مملکتنینگ 60 % عادی بودجهسی انیقلنگن دیگن و کیلگوسی ایکی آیگه قدر بو رقم 95یا 100 %گه ییتیشینی بیلدیرگن. حکیمینینگ سوزلریگه کوره، اوتگن نیچه ییلده بو بیرینچی مرته اختیاری بودجه میزانی غیر اختیاری بودجه کوره آشگن.
اما، قطار نمایندهلر مالیه وزیری سوزلرینی قانیقرلی ایمس دیب، هنوز هم مالیه وزیرلیگیگه قرهشلی ادارهلرده فساد موجودلیگینی ایتگنلر.
نمایندهلردن بیری غلام فاروق مجروحنینگ سوزلریگه قرهگنده مالیه وزیرلیگی اهالی تامانیدن تولهنیله دیگن مالیه سیمستم اوستیده ایشلهشی کیرهک.
عین حالده، نمایندهلر مجلسی اوتگن هفته مخابراتی شرکتلردن 10% مالیه آلینیشی بارهسیده جمهور رییسنینگ صادر قیلگن فرمانینی رد قیلگن ایدی، اما هنوزگچه هم مخابرات شرکتلر مشتریلریدن مالیه آلینهدی.
