لویه څارنوالي وايي، چې د احمد ایشچي د ادعاوو پر بنسټ یې د هېوادمشر لومړي مرستیال جنرال عبدالرشید دوستم ته د اړوندو ۹ تنو د نیولو امر صادر کړی دی.
د لویې څارنوالۍ ویاند جمشید رسولي دا خبرې نن سه شنبې د (جنورۍ پر ۲۴مه) له سلام وطندار سره په ځانګړې مرکه کې وکړي؛ خو ویې نه ویل، چې دا ۹ تنه نیول کېدونکی اشخاص د دوستم ساتونکي دي او که له ده سره کومه بله ګوندي او یا کاري اړیکه لري.
د جنش پخواني غړي احمد ایشچي شاوخوا میاشت مخکې تور پورې کړی و، چې جنرال دوستم او د هغه د ساتونکیو له خوا په جنسي ډول ځورول شوی.
رسولي وايي، چې د ایشچي او دوستم د موضوع د څېړلو له پاره د لویې څارنوالۍ له خوا ټاکل شوي پلاوي دوستم ته د تحقیق له پاره رسمي مکتوبونه ولېږل؛ خو د هغه له خوا د ځواب له نه ورکولو دوی اړ شول، چې دوستم ته د هغو اړوندو ۹ کسانو د نیولو امر صادر کړي، چې احمد ایشچي یې په جنسي ډول ځورولی و.
د رسولي پر وینا، لویې څارنوالۍ د احمد ایشچي ادعاوو ته د ځواب ویلو په پار څو ځلې د هېوادمشر لومړي مرستیال ته رسمي مکتوبونه لېږلي، چې د موضوع د څېړلو په اړه ټاکل شوي پلاوي ته خپله یا قانوني استازی وروپېژني؛ خو تر اوسه یې نه کوم مکتوب ځواب کړی او نه د څېړنې هرکلی کړی دی.
خو پوښتنه دا ده، چې دوستم ته اړوند ۹ تنه به ونیول شي او که نه او په راتلونکې کې به د څېړنکي پلاوي اقدام څه وي؟
