لوگر ولایتی کینگش اعضالری، مذکور ولایت‌نینگ تورمه‌لریده‌گی محبوس‌لر بیلن قانون و خلق ارا اصول‌لرگه قرشی یانده‌شیله‌دی دیگن‌لر.
اولرنینگ سوزلری‌گه کوره، مذکور ولایت پولیس قوماندانلیگی‌نینگ بلند مرتبه‌لی رسمیلری جرم‌گه عیب‌لگن‌لر بیلن قوپال یانده‌شه‌دی.
لوگر ولایتی کینگش، ولایت امنیه قوماندانی‌نی عیبله‌ب حبس‌گه آلینگن‌لر بیلن تیکشیروو جریانی‌ده محبوس‌لرنی کلتک‌له‌گنی باره‌سیده اونلب شکایت قولگه کیریتگن‌لیک‌لرینی ایتگن‌لر.
ولایتی کینگش باشلیغی حسیب الله استانکزی نینگ سلام وطندارگه ایتیشیچه، نیچه هفته‌دن بویان ایریم محبوس‌لر اوستیدن اوتکزیله دیگن تیکشیرووده، ولایت جنایی جرم لرگه قرشی کوره‌ش مدیری محبوس‌لرنی شکنجه قیلگن.
استانکزی، ولایتی کینگش و عاموی اخبارات واسطه‌لر نماینده‌لری بیلن مرکزی تورمه‌گه باریب محبوس‌لرنی یقین‌دن کوزتگن‌لیک‌لرینی ایتگن. محبوس‌لربیلن قوپال معامله بولگن لیگی کوزه‌تیلگن. ایتیلیشیچه، ایریم زندان‌لر تحقیق جریانی‌ده حتی برققه بیریلگن‌لر.
سلام وطندار بیلن صحبت قیلگن لوگر ولایت تورمه‌سیده‌گی محبوس‌لردن ایریم‌لریگه کوره، نا معلوم دلیل‌لر سبب حبس‌گه آلینگن‌لر. قولگه آلینگن چاغده ولایت امنیه قوماندانی جنایی جرملرگه قرشی کوره‌ش مدیری تامانیدن زوردن ایریم جرملرگه عیب‌لنگن‌لیک‌لرینی ایتگن‌لر.
عبدالطیف و عبدالحمید ناملی محبوس‌لرگه کوره، ولایت جنایی جرملرگه قرشی کوره‌ش اداره‌سی باشلیغی محبوس‌لر بیلن قوپال معامله قیله‌دی.
عبدالحمید، کلتک‌لنگن و برققه بیریلگن‌دن سونگ، هیچ قنده‌ی حجت‌سیز سیاسی جرمنی تن آلیش‌گه مجبور قیلینگن لیگینی ایتگن.
شونینگ‌دیک عبدالطیف، پولیس قوماندانلیگی جنایی جرملرگه قرشی کوره‌ش مدیری تامانیدن قتیق کلتک‌لنگن‌دن سونگ اولیم حالگه کیلگن لیگینی حکایه قیلگن.
محبوس‌لر دولت‌دن، اوشبو تورمه‌گه هیات یوباریب، مذکور تورمه وضعیتی‌نی یقین‌دن کوزه‌تیش‌نی سوره‌گن‌لر.
اما، ولایت امنیه قوماندانی جنایی جرملرگه قرشی کوره‌ش مدیری شیرداوود آرین نینگ سلام وطندارگه ایتیشیچه، هیچ بیر کیمسه عیبی بولمس‌دن توریب حبس‌گه آلینمه‌گن وهیچ کیمسه هم بیراونی کلتک‌لمه‌گن.
اونگه کوره، بیز حجت اساسیده کیشی‌لرنی حبس‌گه آلگن میز. مذکور محبوس‌لرفقط تورمه‌دن آزاد بولیشی اوچون بونده‌ی مساله‌نی اورته‌گه قویگن‌لر.
لوگر مرکزی تورمه‌سی بوندن بیش ییل آلدین ولایت‌ده ییرلشگن ناتو کوچلری آرقه‌لی قوریلگن. ایتیلیشیچه، حاضرگی کونده مذکور تورمه‌ده 200 محبوس سقلنه‌دی.
عین‌حالده، افغانستان انسان حق حقوق‌لری خلق ارا اعلامیه‌سی‌گه قول قویگن و مذکور اعلامیه‌گه موافق عمل قیلیشی شرط.
