لوگر ولایتی محلی رسمیلرینینگ ایتیشیچه، اوشبو ولایت چرخ تومنینینگ برچه مکتبلری طالبلر تامانیدن یاپیلگن. لوگر حاکمی سوزلاوچیسی سلیم صالحنینگ ایتیشیچه، امنیتی کوچلرنینگ عملیاتی گه عکسالعمل طالبلر چرخ تومنینینگ برچه مکتبلرینی یاپگن.
اونگه کوره، قوم بویوکلری آره گه کیریب و یاپیلگن مکتبلرنی قیتهدن آچیش اوچون سعی و حرکت قیلهدیلر.
صالح نینگ کوپهیتیریشیچه، شنبه کیچه امنیتی کوچلر بیر عملیات نتیجهسیده طالبان گروهینینگ قومندانلریدن بیرینی اولدیریب و باشقه 5 اعضاسینی قولگه آلگن و طالبلر ایسه، بو واقعه گه عکسالعمل بیلدیریب و مکتبلرنی یاپگن.
شونینگدیک، لوگر معارف ریاستی سوزلاوچیسی محمد شاپور عربنینگ ایتیشیچه، چرخ تومنیده طالبلر برچه مکتب دروازهلرینی اوقووچیلر یوزیگه یاپگن. اونگه کوره، مذکور تومننینگ برچه مکتبلری اوتگن کوندن بویان یاپیلگن و نتیجهده مینگلرچه اوقووچی اوقیش دن محروم بولگن.
لوگر معارف ریاستی سوزلاوچیسینینگ ایتیشیچه، چرخ تومنیده 30 مکتب موجود و 11 مینگدن آرتیق اوقووچی مذکور مکتبلرده درس اوقیدیلر. اونگه کوره، اوقووچیلردن 2 مینگ تهسی قیزلر دیر.
شونینگدیک، چرخ تومنی اوقووچیلری، مذکور تومن معارف مسؤوللریدن اوقیشلریگه توسیق بولمسلرینی سورهیدی. اوشبو اوقووچیلرنینگ ایتیشیچه، یکشنبه کوندن بویان مکتب گه باره آلمهیدیلر.
عین حالده، طالبان گروهی سوزلاوچیسی ذبیحالله مجاهدنینگ ایتیشیچه، مکتبلرنی یاپیش طالبلرنینگ ایشی ایمس و اولر بو توغریده تدقیقات قیلهدی.
ایتیلیشیچه، بوتون لوگر ولایتیده 320 اوقیش مرکزی فعالیت قیلهدی و او مرکزلرده 150 مینگدن آرتیق اوقووچی درس اوقیدی و بو جملهدن 40 مینگ تهسی قیزلر دیر.
