لوگر ولایتینینگ امنیتی مسؤوللری اوچ اوقیوچینی ماین اورنهتیشگه عیبلب قولگه آلگنلیکلریدن خبر بیرگنلر. ولایت پولیس قومانداللیگینینگ سوزلاووچیسی شاهپور احمدزینینگ سلام وطندارگه ایتیشیچه، مذکور اوقیوچیلر ولایتنینگ محمدآغه ولسواللیگیده قولگه آلینگنلر.
جناب احمدزی، حادثهگه عیبلهنیب قولگه آلینگنلر اوز عیبینی تگن آلگن دیگن و موضوع کوپراق تحقیق ایتیلیشی اوچون باشقرهلاوچیلیککه یوباریلگن.
لوگر پولیس قوماندانلیگینینگ سوزلاووچیسی، اوشبو اوقیوچیلر اوز اعترافیده اوچ مرته طالبلرنینگ زرغون شهر مرکزیگه باریب، اوشبو ماینلرنی اوشه ییردن قولگه کیریتگنلر دیگن.
قولگه آلینگنلر 15، 14 و 11 یاشده بولگنلر. اولرنینگ بیرتهسی آلتینچی صنف اوقیوچیسی و ایکیتهسی ایسه محمدآغه ولسواللیگی «ده نو» مکتبینینگ توقیزینچی صنف اوقیوچیسی بولگن
محمدآغه ولسواللیگی امنیه قوماندانی مطیعالله عبدالرحیمزی خبرنی تصدیقلب، اوشبو اوقیوچیلر پولیس کوچلری هلاک ایتیلیشی اوچون بو ماینلرنی کابل – گردیز عمومی یولیده اورنهتیش نیتده بولگنلر.
جناب عبدالرحیمزیگه کوره، قوراللی طالبلر بلاغتگه ییتمهگن گودکلردن فایدلنهدی. لیکن هنوزگچه بو توغریده طالبلر هیچ نرسه دیمهگن.
بیرینچی مرته ایمس قوراللی طالبلر یوللرگه ماین اورنهتیشده گودکلردن فایدهلنگن بولسه. بوندن آلدین هم اوشبو گروه ایریم هجوملر همده ماین اورنهتیشلرده گودکلردن فایدهلهنیب کیلگن.
بو توغریده لوگر ولایت معارف ادارهسی فکرینی آلیشگه حرکت قیلدیک، اما اولر مذکور موضوع بارهسیده خبرسیز ایکنلیکلرینی ایتگنلر.
بیرلشگن ملتلر تشکیلاتینینگ بالهلر کنوانسیونی اساسن 18 یاشدن کیچیک کیشی «باله» حسابلنهدی و بو یاشده بولگن بالهلرنی سوء استعمال قیلیش منع ایتیلگن. اما ایریم گزارشلرده، افغانستاننینگ اوزاق ولایتلریده بلاغتگه ییتمهگن گودکلر جنگریلر تامانیدن کینگ کولمده سوء استعمال قیلینیشی ایتیلهدی.
