د لویې څارنوالۍ ځای ناستي نور حبیب جلال کابل کې د څارنوالانو ټولنې ته په یوه ناسته کې وویل، چې د فرخندې د وژنې قضیه ۱۴ څارنوالان پر مخ وړي او ټاکل شوې ډېر ژر یې پايله خلکو سره شریکه شي.
فرخنده نومې ۲۷ کلنه پېغله د تېرکال د (مارچ په۱۹مه) د کابل ښار د شاه دوشمشېره جومات مخې ته یوې ډلې قهرېدلو کسانو د قران کریم سوځولو په تور، لومړی په سوکانو، لغتو، کوتکو او ډبرو ووژله او وروسته یې د هغې مړي ته اور ورته کړ.
جلال د دې قضیې په تړاو وویل، چې د یادې قضیې اصلي عاملینو پر خپلو جرمونو اعتراف کړی دی.
د لویې څارنوالۍ ځای ناستي ډاډ ورکړ، چې هیڅوک پر دوی فشار نه شي راوړی او د هیچا فشار ته به تسلیم نه شي.
هغه وايي د فرخندې قضیه به د قانون او عدالت په رڼا کې وڅېړل شي.
د تېر کال پغمان قضيې په څېر د فرخندې قضيې په اړه هم عام خلک جدي دي او ډېری وګړي غواړي د دغې قضيې څخه ګام په ګام معلومات ولري.
