د افغانستان د ازادو او عادلانه ټاکنو بنسټ یا فیفا وايي، چې حکومت د ملي شورا او ولسوالیو شوراګانو ټاکنو له پاره هیڅ ډول چمتوالی نه لري.
د دغه بنسټ مسوولين نن دوشنبه ( ډسمبر ۷مه) د يوې خبري ناستې په ترڅ کې وویل، چې حکومت باید د غوراوي کمېټې ته جدي پاملرنه وکړي.
د فیفا اجرایه مشر یوسف رشید خبريالانو ته وویل، چې د هرې ورځې په تیریدو سره افغان حکومت د اساسي قانون څخه واټن اخلي او هره ورځ پر حکومت د خلکو بی باوري زیاتیږي.
د رشید پر وینا، حکومت باید ژر تر ژره د غوراوي کمیټې کار پیل کړي او سیاست مداران نه باید له مدني ټولنو ابزاري استفاده وکړي.
د دغه بنسټ د موندنو پر بنسټ، ټاکنو پورې اړوند بنسټونه د ملي شورا او ولسوالیو شوراګانو ټاکنو په برخه کې هیڅ راز چمتوالی نه لري.
د فیفا د مسوولینو پر وینا، د هیواد په ځینو ولسوالیو کې د اړوندو ادارو ترمنځ اختلافات شتون لري.
په همدې حال کې د چارو ادارې فرهنګي مشر میاګل وثیق رسنیو ته وویل، چې حکومت د غوراوي کمیټې کار پیلیدو په برخه کې هیڅ ډول خنډ نه ویني.
وثیق زیاتوي، چې په هره اندازه چې د مدني بنسټونو ترمنځ همغږي وي د غوراوي کمېټې کار ته اعتبار وربښي او د ټاکنو بهیر هم مشروعیت پیدا کوي.
په همدې حال کې ولسي جرګې هم نن له حکومته وغوښتل، چې د ولسي جرګې او ولسوالیو شوراګانو ټاکنو نیټه روښانه کړي.
