د افغانستان د کورنیو چارو وزارت د چنګاښ پر ۳۱مه نېټه ویلي وو، یوې ښځې چې پر سترې محکمې یې د برید نیت لرلو؛ د دې محکمې د دروازه ساتونکیو له خوا ووژل شوه.
زینب وسله پر لاس هغه ښځه وه، چې د سترې محکمې د ودانۍ په خوله کې یې یو ساتونکی ټپی کړی و، چې له هغې وروسته بیا د محکمې د امنیتي ساتونکیو له خوا ووژل شوه.
خو زینب څوک وه او ولې ووژل شوه؟ ایا هغې پر سترې محکمې د ځانمرګي برید نیت کړی و؟
د کابل د جنايي څېړونو رییس فریدون عبیدي له سلام وطندار سره په خبرو کې وویل، چې زینب ترهګره نه وه او له هېڅ ډول ترهګریزې ډلې سره یې اړیکه نه لرله.
د عبیدي په خبره، زینب کورنۍ ستونزې لرلې او هغه یې پرته له پوښتنې مېړه ته ورکړې وه. د کابل د جنايي څېړونو رییس همدارانګه وايي، د زینب مېړه په پاکستان کې ژوند کولو او کورنۍ دې ته هم پاسپورټ او وېزه اخیستې وه، چې سر له سبا یې پاکستان ته ور ولېږي.
عبیدي زیاتوي، زینب د خپل ورور وسله چې دوه مرمۍ په کې وې؛ راخیستې وه او په لاسونو یې "الله" او "الله اکبر" لیکلي وو، چې پولیس پرې د ترهګرې فکر ونه کړي.
خو د عبیدي په نظر، زینب د یوې مذهبي کورنۍ غړې وه، چې په ځلونو ـ ځلونو یې د ځانوژنې هڅه کړې وه، خو بریالۍ شوې نه وه، بلاخره یې د بریدګرې په جامه کې په لوی لاس پر پولیسو ځان ووژلو.
عبیدي همدارنګه وايي، پولیسو د زینب پر وړاندې قانوني عمل کړی، چې د ترهګریز برید د مخنیوي په نیت یې هغه وژلې ده، خو دی له هر ډول ترهګریزې ډلې سره د زینب اړیکه په کلکه ردوي.
له بل لوري د عدلي طب د خدماتو معاون دل اقا محبوبي سلام وطندار ته وویل، چې د دې ښځې پر لاسونو "الله" او "الله اکبر" لیکل شوي وو، خو په نور وجود یې پرته له تازه زخمونو نه، د وسلو هېڅ ډول نښې نه وې.
د عدلي طب د خدماتو معاون وايي، چې د پېښې په مازدیګر مهال شمس الرحمان د زینب ورور، چې د هغې تذکره ورسره وه، راغی او د هغې جسد یې یووړ.
له دې هر څه سره ـ سره هماغه وخت د کورنیو چارو وزارت راپورونه خپاره کړي وو، چې زینب د سترې محکمې د برید پر تور وژل شوې؛ خو اوس ښکاره شوه، چې هغې له هېڅ ډول ترهګریزې ډلې سره اړیکه نه لرله.
