د کندوز ولایتي شورا غړي غلام رباني سلام وطندار سره په مرکه کې وویل، چې وسله والو طالبانو د کندوز ښار په چوک او د ښار په نورو سیمو کې خپل بیرغ پورته کړی دی.
رباني وايي، ولسي خلک له ښاره د تېښتې په حال کې دي او هوايي ډګر ته ځانونه رسوي.
غلام رباني زیاتوي، د مولوی یفتلي په مشري افغان ځانګړي ځواکونه د جګړې ډګر ته داخل شوي او هڅه کېږي، چې د کندوز ښار بېرته ونیسي.
د ولایتي شورا بل غړي امرالدین ولي بیا سلام وطندار ته وویل، چې د کندوز ښار په بشپړ ډول طالبانو نه دی نیولی.
امرالدین ولي وايي، چې د کندوز والي او امنیه قوماندان په خپلو دفترونو کې دي او په ښار کې د افغان امنیتي ځواکونو او طالب وسله والو تر منځ درنه جګړه روانه ده.
امنیتي بنسټونو تراوسه د کندوز ښار د سقوط موضوع نه ده تایید کړې
د لوی درستیز مرستیال جنرال مراد علي مراد سلام وطندار ته وویل، چې امنیتي وضعیت د ځواکونو په کنټرول کې دی او طالبانو د ماتې په حال کې دي.
وسله والو طالبانو نن (دوشنبه) ګهیځ ۳ بجې له څلورو خواوو د کندوز په ښار ډله ییز بریدونه پیل کړې وو؛ د ۸۰۸ سپین غر زون ویاند محبوب الله اکبري په خبره، وسله والو طالبانو د کندوز له سه درک، په لوېدیځ کې له زاخېل کلي، په ختیځ کې له چرخاب او په سویل ختیځ کې له ناصریانو کلي د کندوز په ښار بریدونه پیل کړل.
وسله والو طالبانو رسنیو ته په لېږل شوې خبرپاڼه کې ویلي، چې د کندوز ښار یې نیول دی.
