.jpg)
د کندهار ښاریان شکایت کوي، چې برېښنا نه لري او دې چارې له بېلابېلو ستونزو سره مخ کړي دي.
د دې ولایت اوسېدونکي له حکومته غواړي، چې ستونزې ته یې حل ولټوي.
د کندهار ښار څو تنو اوسېدونکو سلام وطندار ته وویل، چې له څلورو ورځو راهیسې په ښار برېښنا غوڅه شوې او خلک د ورځني ژوند په برخه کې له ستونزو سره مخ شوي دي.
دوی وايي، له یوې خوا هوا سړه شوې او له بلې خوا په ښار باندې برېښنا غوڅه شوې، چې د اوبو او اطلاعاتو په برخه کې له ستونزو سره دي.
په ورته وخت کې د کندهار ښار د برېښنا شرکت سوداګرۍ برخې مسوول امان الله ایوب فاروقي وايي، چې د خلکو په ستونزو خبر دي، خو د جګړو له امله د هلمند په سنګین ولسوالۍ کې له کجکي د برېښنا راغځېدلی مزی پرې شوی او د سترو جنراټورونو تېل هم خلاص شوي، چې ښاریانو ته حراراتي برېښنا ورکړي.
فاروقي وايي، د مزو د بېرته تړلو په موخه یې سیمې ته له تېرو درېیو ورځو راهیسې مسلکي کسان ورلېږلي دي.
دی وايي، د برېښنا د مزو تړلو ستونزه ژر نه حل کېږي، ځکه چې په سیمه کې ګڼې امنیتي ستونزې موجودې دي.
امان الله ایوب فاروقي وايي، له مرکز څخه یې د جنراټورونو له پاره د تېلو غوښتنه کړې او هڅه کوي، چې د برېښنا په برخه کې د خلکو ستونزې حل کړي.
د چارواکو پر وینا، کندهار ښار یونیم سل میګاواټه برېښنا ته اړتیا لري، چي اوسمهال یوازې ۱۲ میګاواټه برېښنا له کجکي بند څخه تولیدیږي او یوه کمه اندازه د جنراټورونو حرارتي برېښنا ده، چې د برېښنا په برخه کې د کندهار ستونزه نه شي حل کولی.
