.jpg)
د هرات ولایت د ټاکنو خپلواک کمېسیون ریس داود صدیقزاده وايي، د نوم لیکنې په مرکزونو کې ورځ تر بلې د ولسي جرګې او ولسوالیو شوراګانو د ټاکنو لهپاره د خلکو د نوم لیکنې لړۍ پراخېږي.
که څه هم ښاغلي داود صدیقزاده د نوم لیکنې په مرکزونو کې د ثبت شویو کسانو شمېر په داګه نه کړ خو ویې ویل تراوسه پورې د نوم لیکنې ګډونوال یې ۴۰ سلنه ښځې او ۶۰ سلنه نارینه دي.
د هرات د ټاکنو خپلواک کمېسیون د معلوماتو لهمخې، په دغه ولایت کې به د ولسي جرګې او ولسوالیو شوراګانو د ټاکنو پرمهال ۴۶۲ د رایې ورکولو مرکزونه فعال وي.
بلخوا د فراه والي عبدالبصیر سالنګي پر پاکستان تور لګولی چې د افغانستان د ولسي جرګې او ولسوالیو شوراګانو د ټاکنو لهپاره خنډونه جوړوي.
ښاغلي سالنګي د فراه ولایت په اوسېدونکیوغږ وکړ چې د پاکستان او نورو ګاونډيو هېوادونو لاسوهنې ته تسلیم نهشي او په ټاکنو کې پراخ ګډون وکړي.
دغهراز د غزني ولایت د یوشمېر ناامنو سیمو اوسېدونکیو د ټاکنو کمېسیون دروازې مخې ته د اعتراض خیمې درولي. اعتراض کوونکي له حکومته غواړي چې په غزني ولایت کې د ولسي جرګې او ولسوالیو شوراګانو ټاکنې حوزوي کړي.
اعتراض کوونکي وايي، د ولسوالیو تړلي مرکزونه دې ورته پرانیستل شي او دغهراز دې د ټاکنو په ولایتي دفتر کې ګومارنې رڼې او د نوم لیکنې بهیر دې وغځول شي.
.jpg)
پهدې اړه مو په غزني کې د ټاکنو خپلواک کمېسیون ولایتي دفتر سره اړیکه ونیوله، خو ځواب مو ترلاسه نه کړ.
اخوا د بامیانو ولایت د ټاکنو خپلواک کمېسیون رییس علي شاه مصباح وایي د نوم لیکنې په ۳۲ مرکزونو کې ۷ زرو کسانو نوم لیکنه کړې خو په دغه ولایت کې لویه ستونزه دا ده چې زیات شمېر کسان پېژندپاڼې نه لري.
ورته وخت کې په لوګر کې هم د ولسي جرګې او ولسوالیو شوراګانو ټاکنو د نوم لیکنې بهیر لهپاره جدي امنیتي تدابیر نیول شوي دي او د نوم لیکنې ټول مرکزونه پرانیستي دي.
په دې اړه د لوګر امنیې قوماندان لوي پاسوال عصمت الله علیزي وویل، اوسمهال د لوګر په مرکز پل علم کې د نوم لیکنې لړۍ پيل شوې او دغه لړۍ به ولسوالیو او کلیو ته هم له ټينګ امنیت لاندې ولېږدول شي.
بلخوا د لوګر والي محمد انورخان اسحاقزي د لوګر له اوسېدونکیو وغوښتل چې د ولسي جرګې او ولسوالیو شوراګانو د ټاکنو لهپاره نوم لیکنه وکړي.
ښاغلي اسحاقزي پر دیني عالمانو، قومي مشرانو او مدني ټولنو غږ وکړ چې د ټاکنو لهپاره خلک راوبولي.
د ټاکنو خپلواک کمېسیون د وري په پنځه ویشتمه نېټه د ولایتونو په مرکزونو کې د نوم لیکنې بهیر پیل کړ چې له هغه وروسته به یې دویم او درېیم پړاوونه په ولسوالیو او کلیو کې ترسره کېږي.
