کابلښاریان د نوماندانو له لوري د دوی پر دروازو او دېوالونو له تصویر راځړولو ناخوښه دي او وايي چې باید د ټاکنیزو سیالیو پرمهال ښاري اصول په پام کې ونیسي.
د دوی په وینا، هغه سریښلرونکي توکي چې پر تصویرونو لګېدلي، د تنفس او پوستکي ناروغیو لامل کېږي او نوماندان باید پهدې برخه کې د خلکو حقونو ته درناوي وکړي.
د ټاکنیزو سیالیو د هرې ورځې په تېرېدو کابل ښار کې د نوماندانو تصویرونه او تبلیغاتي بنرونه ډېرېږي او د تبلیغاتو اړوندو ځایونو پرځای یې د خلکو پر دېوالونو، دروازو، د برېښنا پر پایو او نورو عامه ځایونو لګوي.
د کابل ښار اوسېدونکي نوروز او عبدالحمید پر نوماندانو او د هغوی پر پلویانو نیوکه کوي او وايي، د ټاکنیزو سیالیو پرمهال یې کابلښاریانو ته سرخوږی جوړ کړی او باید د خلکو حقونو او ښاري اصولو ته پام وکړي.
په همدې حال کې د پوستکي ناروغیو متخصص راشد رامز هم د کابلښاریانو اندېښنې پرځای بولي او وايي، په تصویرونو او بنرونو کې شته سرېښناکه ماده کېمیاوي توکي لري او د تنفسي ناروغیو ترڅنګ، د سترګو او پوستکي ناروغیو لامل هم کېږي.
ولسي جرګې ته د نوماندانو ټاکنیزو سیالیو له پیل سره سم پر نوماندانو د کمپاین په بڼه د خلکو نیوکې هم ډېرې شوي، خو داسې ښکاري چې یاد نوماندان د خلکو غوښتنو ته چندان غوږ نه نیسي.
