د ټاکنو خپلواک کمېسون رییس عبدالبدیع صیاد نن ماښام د ولسي جرګې د ټاکنو د دویمې ورځې په پای ته رسېدلو سره په خبري کنفرانس کې اعلان وکړ چې له غزني او کندهار نه پرته په ۳۲ ولایتونو کې ۴ میلیونو کسانو په ټاکنو کې ګډون وکړ.
ښاغلي صیاد زیاته کړه چې د ولسي جرګې په ټاکنو کې ۴۵ سلنه په شرایطو برابرو کسانو رایه ورکړېده.
ده په ورته وخت کې دا هم وویل چې نن د ځېنو مشکلاتو له امله د رایو له پاتو مرکزونو نه یوازې ۶۷ مرکزونو کې ټاکنې وشوې.
ښاغلي صیاد په دې ټاکنو کې د ښځو ونډه ۳۳ سلنه وښوده.
ده دا هم وویل چې پهدې ټاکنو کې له تېرو هغو ډېرو هېوادوالو ګډون کړیو.
ده ولس ته ډاډ ورکړ چې د دوی د رایو ساتنه به کوي.
ده له ولسه وغوښتل چې له وخته مخکې قضاوتونو نه ځان وساتي او د کمېسیون وروستیو پایلو ته منتظر پاتې شي.
ښاغلي صیاد زیاته کړه چې له ولایتونو نه به مرکز ته ډېر ژر رایې راروسېږي او بیا به د شکایتونو له رسیدهګۍ وروسته پایلې اعلان کړي.
ده په ورته وخت کې له سیاسي ګوندونو او بنسټونو وغوښتل چې د رایو شمېرنې او شکایتونو ته له رسېدهګۍ نه جدي څارنه وکړي.
د افغانستان د ولسي جرګې ټاکنې له درې کلن ځنډ وروسته د شنبې په ورځ پیل شوې؛ ټاکل شوېوه چې دا بهیر په یوه ورځ کې خلاص شي؛ خو د تخنیکي او امنیتي ستونزو له امله د دویمې ورځې د ماښام په ۶ بجو پای ته ورسېد.
