تازه راپورونه وايي چې پخوانی جهادي رهبر او دحقاني شبکې مشر جلال الدين حقاني هم مړ شوی دی
پاکستاني رسنيو په خپل تازه راپور کې ویلي دي چې د حقاني شبکې دغه مشر۱۶ میاشتې وړاندې مړ شوی او په خوست ولایت کې خاورو ته سپارل شوی.
د ایکسپرس په نوم دپاکستان خصوصي تلویزون وايي چې د جلال الدین حقاني دمړينې خبر طالبانو هم تاييد کړی دی.
جلال الدين حقاني د شوري په خلاف د جهادي رهبرانو په منځ کې مشهوره څېره وه او په پکتیا، پکتیکا او خوست ولایتونو کې د سرو لښکرو پر وړاندې جنګېده.
د طالبانو د واکمنۍ پر مهال جلا الدين حقاني خپل کارونه او فعالیتونه کم رنګ کړل خو په ۲۰۰۱ زیږدیز کال کې کله چې امريکايي ځواکونو د طالبانو د امارت نسکورېدو له پاره افغانستان ته راغلل، حقاني دخپلو پلویانو سره یو ځل بیا د بهرنيو ځواکونو په خلاف ټوپک پورته کړ او له وزیرستانونو یې خپلې جبهې رهبري کولې.
په ۲۰۰۸ کال کې په خوست کې د امریکايانو په یوه استخباراتي اډه له برید وورسته چې زیات لوړپوړي استخباراتي مامورين په کې وژل شوي و حقاني شبکه په رسنيو کې د بحث وړ موضوع وګرځېده.
له هغې وروسته څو نور لوی لوی بریدونه هم د حقاني شبکې له لورې په افغان حکومت او بهرنيو ځواکونو ترسره شول.
امريکا په وار وار سره له پاکستانه غوښتنه کوله چې د حقاني شبکې په خلاف عملیات وکړي او له پخو یې وغورځوي.
په ورستيو کې په کابل او نورو ولایتونو کې سخت او حساس بريدونه دهمدې شبکې له لورې ترسره شوي و او افغان امنیتي ادارو یې هم تور پر حقاني شبکې اچولی و.
جلال الدين حقاني ۳ زامن مشهور و چې یو یې د بې پېلوټه الوتکې په برید کې، او بل یې په اسلام اباد کې نا معلومو وسله والو وواژه.
دریم زوی یې سراج الدین حقاني دی چې په خلیفه مشهور دی او د حقاني شبکې مشري په غاړه لري.
راپورونه وايي چې معلومات په ډاګه کوي چې جلال الدین حقاني په خپل ژوند خپل زوی خلیفه سراج الدین حقاني د خپل ځای ناستي په توګه ټاکلی و، چې اوس طالبانو مشرانو د ملا اختر محمد منصور د مرستیال په توګه ټاکلی دی.
د ایکسپرس سرچينو دا هم ویلي دي چې حقاني په خپل طبعي مرګ مړ شوی و.
تر اوسه افغان حکومت یا کومې بلې معتبرې سرچينې ددې خبر د رد او تایید په اړه څه نه دي ويلي.
تېره اونۍ د طالبانو د مشر ملا عمر د مرګ اوازه هم راپورته شوه چې بیا افغان حکومت تایید کړه او زیاته یې کړه چې ملا عمر په ۲۰۱۳ کال کې مړ شوی و.
د طالبانو د مشر ملا عمر د مرګ دخبر له تایید وروسته لومړی پیښه د سولې خبرو د دویم پړاو ناسته وه چې تر نامعلومه وخته وځنډېدله.
