د مصالحې عالي شورا مشر عبدالله عبدالله د خپل نوي ماموریت تر پیلولو وروسته نن شنبه په کابل کې يوې خبري ناسته کې وويل، د مصالحې عالي شورا د غړيو د ټاکل کېدو په اړه یې سلا مشورې پيل شوي او په راتلونکې اوونۍ کې به یې نومونه په ډاګه شي.
عبدالله عبدالله زیاته کړه، په دغه شورا کې به د ښځو او ځوانانو په ګډون ټول اړخونه شامل وي او په بشپړ صلاحیت سره به د سولې خبرې پیل کړي.
د مصالي عالي شورا مشر له طالبانو سره د سولې د کورنیو خبرو پیل کېدو نېټه په ډاګه نه کړه خو هیله یې وښوده چې دغه خبرې به راتلونکو دوو اوونیو کې پيل شي.
عبدالله د اختر په لومړیو درېیو ورځو کې د افغان حکومت او طالبانو له لوري د اوربند اعلان او تر هغه وروسته د تاوتریخوالي کمېدل او دغه راز د دواړو لورو له پلوه د بندیانو خوشې کول د افغانانو ترمنځ د سولې خبرو اترو پیل کېدو لپاره یوه ښه زمینه وبلله او زیاته یې کړه چې مذاکراتي ټيم د سولې خبرو پیلېدو ته پوره چمتووالی لري.
د مصالحې عالي شورا مشر عبدالله عبدالله وايي، د سیاسي هوکړې له لاسلیک وروسته د ملي مصالحې شورا د تشکیل او سولې مذاکراتو ته د چمتواوالي په اړه هڅې زیاتې شوې دي.
عبدالله زیاته کړه چې د سولې په اړه تر ټولو مهمه مسئله د افغانستان د خلکو اجماع ده چې په وینا یې د ده او ولسمشر غني ترمنځ د سیاسي هوکړې له لاسليک وروسته دغه ستونزه هم هواره شوه.
د ملي مصالحې عالي شورا د ولسمشر محمد اشرف غني او عبدالله عبدالله ترمنځ له سیاسي هوکړې وروسته جوړه شوه. د دغه هوکړې له مخې به عبدالله د اوسني حکومت تر پایه د دغې شورا ریاست پر غاړه ولري.
