د ازادو رسنیو ملاتړ بنسټ (نی) چارواکو نن (دوشنبه) ورځ په کابل کې یوې جوړې شوې غونډې کې وویل، چې د وروستیو جګړو د زیاتېدو له امله د کندوز، هلمند او له فراه ولایتونو له ۲۰۰ زیات خبریالان ګاونډیو او لرې ولایتونو ته تللي دي.
د دې بنسټ مشر صدیق الله توحیدي وویل، چې له نیمايي زیات خبریالان د هلمند ولایت څخه د ځان ژغورلو په پاره کندهار، کابل او فراه ولایتونو ته پناه وروړې ده.
د توحیدي په وینا، تر اوسه له خبریالانو سره د تاوتریخوالي ۵۰ پېښې هم ثبت شوي دي.
د نی مشر وايي، په کندوز ولایت کې د جګړې له امله د روشني، خاور او شبنم په نوم راډیوګانې او تلویزیون ویجاړ شوي او د دې رسنیو ټول وسایل غلا شوي دي.
د افغانستان د ازادو خبریالانو د ټولنې رییس رحیم الله سمندر روان کال د خبریالانو له پاره له تاوتریخوالي ډک کال وباله.
سمندر وویل، سږ کال له خبریالانو سره د تاوتریخوالو په پېښو کې قتل، ګواښ او وهل ټکول شامل دي.
په جګړه ییزو ولایتونو کې زیان من شوې رسني له حکومته غواړي، چې کلنۍ مالیه ورته معاف کړي او د وسایلو په اخیستلو کې ورسره مرسته وکړي.
د خبریالانو مدافع بنسټونه په داسې حال کې د خبریالانو په وړاندې د تاوتریخوالي د زیاتېدو او له جګړه ییزو ولایتونو د خبریالانو له بې ځایه کېدو خبرې کوي، چې پرون ورځ د زابل ولایت د ملي تلویزیون خبریال محمد یعقوب شرافت د ناپېژاندو وسله والو له خوا ووژل شو.
