د کندوز ولایت ځايي چارواکي وايي، وسله والو طالبانو څلور ورځې مخکې ۲۳ کسان له داعشي وسله والو سره د اړیکو درلودلو په تور ونیول، چې تېره یک شنبه ۳ هغه یې په ګولیو ویشتلي دي.
د دشت ارچي ولسوال نصیرالدین سعدي سلام وطندار ته وویل، دغه کسان طالبانو د دې ولسوالۍ په ملاقلي سیمه کې له داعش ډلې سره د اړیکو درلودلو په تور نیولي او له ځانه سره یې وړي دي.
دی وايي، پاتې نور اسیران له طالبانو سره په بند کې دي.
د کندوز د ولایتي شورا رییس امرالدین ولي وايي، په دې ولایت کې د داعش ډلې ظهور او تشکیلېدو په اړه اوازې موجودې دي، خو حکومت یې د ختمولو په برخه کې خاص اقدامات نیولي نه دي.
د امرالدین ولي په خبره، طالبانو تېره ورځ د نیول شویو کسانو د ډلې له یوه هغه یې سر غوڅ کړی دی.
دی وايي، د نیول شویو او د ډې ډلې د وژل شویو کسانو هویت معلوم نه دی.
د کندوز ولایت مقام چارواکي د نیول شویو کسانو هویت په اړه څه نه وايي، خو سیمه ییز خلک بیا وايي، نیول شوي ټول د طالبانو پخواني غړي دي.
د دشت ارچي ولسوالۍ یو استوګن د نوم نه خپرولو په شرط سلام وطندار ته وویل، عبدالعظیم ایوبي د طالبانو یو پخوانی قوماندان و، چې طالبانو د دشت ارچي په دفتاني بازار کې ترې سر غوڅ کړ.
د پامیر ۲۰ فرقې په خپرې شوي خبرپاڼه کې ویل شوي، له دې ډلې دوه وژل شوي کسان د دشت ارچي او چهاردرې ولسوالیو له پاره د طالبانو له خوا د پخواني نومول شوي ولسوال ډاکټر حسین له خپلوانو دي.
وسله والو طالبانو له سلام وطندار سره په اړیکه کې دا پېښه تاييد او یا رد نه کړه.
