په هرات کې د کرونا ویروس له خپرېدو وروسته اسلامکلا ته د ایران له خوا په زوره د افغان کډوالو را اړولو د هرات د ځايي مسوولانو اندېښنې راپورته کړې دي.
د هرات د کډوالو او بېرته راستنېدونکیو چارو رییس جاوېد نادم سلاموطندار ته ویلي، ایراني دولت د ورځې له ۵ سوو نه تر ۷ سوو او ان زرو پورې افغانان د اسلامکلا له لارې افغانستان ته راګرځوي.
د هغه په وینا، د دغو راګرځول شویو کډوالو ترمنځ ماشومان، بېسرپرسته ښځې، روږدي کسان او سپینږیري هم شته چې په زوره خپل هېواد ته راګرځول شوي دي.
د هرات د ولایتي شورا مرستیال توریالی طاهري هم د کرونا ویروس په خپرېدو سره د افغانانو اجباري اېستو څخه اندېښنه ښيي او وايي، ایران دولت یوازې یوه شپه کې یو زر او ۲ سوه افغان کډوال د اسلامکلا پولې ته راګرځولي دي.
په همدې حال کې د هرات د والي ویاند جیلاني فرهاد وايي، د افغان کډوالو د را اېستلو په تړاو د ځايي مسوولانو او افغانانو له اندېښنو وروسته له ایراني لوري سره هوکړه شوې چې د افغان کډوالو د را ګرځولو کچه کمه کړي.
د هغه په وینا، د دې تر څنګ په هرات کې د کرونا ویروس له خپرېدو د مخنیوي په موخه په اسلامکلا کې پر ځینو محدودیتونه هم کار کوي.
په ورته وخت کې د هرات د عامې روغتیا ریاست مسوولان د مسافرانو پر مخ د اسلامکلا لارې د پرانستلو په اړه اندېښنه ښيي او وايي، په یاده سیمه کې د کرونا د تشخیص اېښودل شوې دستګاوې لازم کار نه کوي.
دا په داسې حال کې ده چې تر اوسه په هرات کې د کرونا ویروس یوازې یوه مثبته پېښه شوې ده.
